![](/static/articles/12/86/76/l-9xaXFCzMPL.jpg)
Պատերազմի հետևանքով հաշմանդամություն ձեռք բերած անձանց համար «անկախ կյանքի կենտրոններ» կստեղծվեն
Կառավարությունը նախատեսում է ստեղծել «անկախ կյանքի կենտրոններ», որտեղ պատերազմի հետևանքով հաշմանդամություն ձեռք բերած անձանց համար կիրականացվեն ինքնուրույն կենցաղավարման ծրագրեր, կլինեն անձնական օգնականի ծառայություններ, ինչպես նաև կմատուցվեն մասնագիտական կողմնորոշման և կարիերայի պլանավորման ծառայություններ: Որոշումն ընդունվեց կառավարության մարտի 18-ի նիստում:
Առաջին փուլում կենտրոնները կստեղծվեն 6 մարզերում, որտեղ հաշմանդամություն ունեցող անձանց թիվը մյուսների համեմատ ավելի մեծ է:
Ծրագրի նպատակն է ապահովել զինվորական ծառայության ժամանակ հաշմանդամություն ձեռք բերած անձանց սոցիալական ներառումը և անկախ կյանքի իրավունքը՝ զբաղվածության, սոցիալական, կրթական, մշակութային և տնտեսական միջոցառումների համալիր իրականացման միջոցով:
Ծրագրի շահառուներն են զինվորական ծառայության ժամանակ հաշմանդամություն ձեռք բերած՝
- շարքային, ենթասպայական և սպայական կազմերի պարտադիր և (կամ) պայմանագրային զինծառայողները,
- ոստիկանության, ազգային անվտանգության համակարգերի ծառայողները և փրկարար ծառայողները,
- զորահավաքային զորակոչով կանչված զինծառայողները,
- կամավորականները:
Իրականացվող ծառայությունների արդյունավետությունը բարձրացնելու նպատակով առանձին միջոցառումներում կներգրավվեն նաև սփյուռքի կարողությունները՝ մասնագիտական ներուժը, ֆինանսական և նյութական աջակցությունը:
Մեկնաբանել