Հայաստանի մարզային մեծ ու փոքր քաղաքներում շրջակա միջավայրի պահպանության և կլիմայի փոփոխության հարմարվողականությանն ուղղված կարողությունների ընդլայնման նպատակով «Էյ Թի Փի»-ն Եվրոպական միության կողմից ստացել է €695000 դրամաշնորհ: Վերջինս դրամաշնորհի գլխավոր հայտատու կազմակերպությունն է, իսկ «Ջինիշյան» հիշատակի հիմնադրամը և «Էներգետիկայի հայկական գործակալություն» հիմնադրամը՝ համահայտատու կազմակերպություններ: Այս մասին տեղեկացնում է «Էյ Թի Փի» բարեգործական հիմնադրամի հանրային կապերի բաժինը:

«Կանաչ համայնք, դիմակայուն ապագա» խորագիրը կրող դրամաշնորհային ծրագրի շրջանակում կներկայացվի կանաչ համայնքի քաղաքաշինական մոդելը՝ ուղղված Հայաստանի շրջակա միջավայրի պահպանությանն ու կլիմայի փոփոխության հարմարվողականությանը:

Շահառու համայնքների ցանկում ընդգրկվել են Շիրակի, Լոռու և Տավուշի մարզի 15 քաղաք և դրանց հարակից համայնքները: Ֆինանսավորումը կտրամադրվի հետևյալ աշխատանքների իրականացման համար.

• Կանաչապատել թիրախային 15 համայնքները
• Կանաչապատել 50 դպրոցի և 10-ը այգու տարածքները
• Ընդլայնել թիրախ հանդիսացող քաղաքային համայքների կանաչապատման կարողությունները 

• Մարզային խոշոր և փոքր քաղաքներին կից 10-ը տեղամասում շուրջ 100 հա տարածքի վրա իրականացնել անտառտնկման աշխատանքներ
• Հիմնել 150 տնամերձ տնկարան՝ հիմք ընդունելով «Էյ Թի Փի»-ի մրցանակակիր  տնամերձ տնկարանների ծրագրի մոդելը
• Հիմնել մեկ տնկարան Գյումրիում՝ հիմնվելով «Էյ Թի Փի» -ի կողմից կիրարկվող Միրաք ընտանիքի անվան անտառվերականգնման տնկարանի հաջող մոդելը
• Ստեղծել առցանց տեղեկատվության փոխանակման և ուսուցման հարթակ
• Հզորացնել «Էյ Թի Փի»-ի գործող 5 էկոակումբների կարողությունները՝ միաժամանակ շահառու համայնքներում ստեղծելով ևս 10 էկոակումբ
• Շուրջ 7000 դպրոցականների ընդգրկել բնապահպանական կրթության ծրագրում
• Բնակչության իրազեկվածության մակարդակի բարձրացման նպատակով իրականացնել էկոակումբների և ամենամյա աղբահավաքների ծրագրեր, որոնց ընթացքում կկազմակերպվեն նաև մրցութային արշավներ:

««Էյ Թի Փի»-ն պատասխանատու կլինի քաղաքային կանաչ տարածքների ընդլայնման, համապատասխան ենթակառուցվածքների ստեղծման և բնապահպանական կրթությանն ուղղված գործողությունների համար: «Ջինիշյան» հիշատակի հիմնադրամը կկիրառի իր փորձն ու կապերը տարածաշրջանային դերակատարների կարողությունների զարգացման ոլորտում՝ համակարգելով և կապող օղակ հանդիսանալով համայնքային դերակատարների և շահագրգիռ կողմերի միջև երկխոսության ձևավորման գործում: «Հայկական էներգիայի գործակալություն» հիմնադրամը կմշակի և կիրականացնի վերականգնվող էներգիայի աղբյուրների օգտագործմանը (մասնավորապես արևային սարքեր) և էներգաարդյունավետության պրակտիկայի խթանմանն ու զարգացմանն ուղղված գործողություններ:

Դրամաշնորհային ծրագրի շնորհիվ ընտրված համայնքներում կստեղծվեն կենսապահովման նոր հնարավորություններ: Ավելին, ծրագրի շրջանակում ծառատնկման աշխատանքներում ընդգրկված հարյուրավոր տեղաբնակների հնարավորություն կընձեռվի ստանալ եկամտի հավելյալ միջոցներ:

«Դրամաշնորհային այս ծրագիրը մեզ հնարավորություն կտա ընդարձակելու «Էյ Թի Փի»-ի ծրագրերը՝ ընդգրկելով ավելի շատ համայնքներ, որտեղ կիրականացվեն ոչ միայն կանաչապատման աշխատանքներ, այլ նաև կնպաստենք տվյալ համայնքներում կայուն աշխատանքային պրակտիկայի և ենթակառուցվածքների ձևավորմանը: Մենք անչափ երախտապարտ ենք, որ կկարողանանք մեր բնապահպանական ծրագրերը ընդլայնելով և մեր ամենահաջողված մոդելները կրկնապատկելով մեր ավանդը բերել ներառված համայնքների տնտեսական կենսունակությանը»,- նշեց «Էյ Թի Փի»-ի ծրագրերի համակարգող Արթուր Հարությունյանը:

«Մենք ՝«Հայկական էներգիայի գործակալություն» հիմնադրամի անձնակազմը, ուրախ ենք այս ծրագրի գործընկեր լինելու համար, ինչը ևս մեկ հնարավորություն է խոսելու կանաչ էներգիայի, վերականգնվող և արդյունավետ էներգիայի օգուտների մասին: Շնորհավորում եմ «Էյ Թի Փի» և «Ջինիշյան» հիշատակի հիմնադրամներին և հաջողություն մաղթում բոլորիս՝ մեր նպատակներին հասնելու համար», - նշեց հիմնադրամի գլխավոր տնօրեն Լուիզա Վարդանյանը:

«Կանաչ համայնք, դիմակայուն ապագա» ծրագիրը մեկնարկել է 2021թ.-ի մարտի մեկին Հայաստանում: Ծրագիրը նախատեսված է իրականացնել 36 ամսվա ընթացքում»,- նշված է Հիմնադրամի հաղորդագրության մեջ: