Ինչո՞ւ միացաք Սերժ Սարգսյանին 2008թ., երբ մինչ այդ քննադատում էիք նրանց:

Ես քննադատել եմ տիրող հոռի բարքերը և մշտապես բարձրաձայնել եմ մի շարք արատավոր երևույթների դեմ, նույնիսկ հրաժարական եմ տվել Ազգային ժողովի նախագահի պաշտոնից, իսկ իմ ամբողջ քաղաքական թիմը ինձ հետ վայր է դրել պաշտոնները և դուրս է եկել, ինչը քաղաքական ուժի սկզբունքայնության վառ ապացույց է: Իսկ քաղաքան կոալիցիա կազմելու որոշումը միանշանակ քաղաքական խոհեմ դիրքորոշում էր, որի արդյունքում կանխվեցին ներքաղաքական անկայունության պատճառով մեր երկրին սպառնացող մեծ չափերի արյունահեղությունը և արտաքին ագրեսիան:

Պարոն Բաղդասարյան, Ձեր կարծիքով, ինչո՞վ է մրցունակ Ձեր նախընտրական ծրագիրը:

Նախընտրական ծրագիրը խիստ ընդգրկուն է, որից դուրս չի մնացել որևէ ոլորտ: Էապես կարևոր է, որ մարդիկ ծանոթանան, թե ինչ են առաջարկում քաղաքական ուժերը, և քվեարկեն հանուն գաղափարի, հանուն մեր երկիրը դեպի լավը տանելու անկեղծ պատրաստակամության և հնարավորության: Մեր ծրագրի մրցունակությունը խիստ ակնհայտ է՝ շնորհիվ տարբեր ոլորտներում առաջարկվող այն նորարարական մոտեցումների և գաղափարների, որոնք արմատական փոփոխությունների հիմք են լինելու տարբեր ոլորտներում: Դրանցից կարող եմ առանձնացնել մանր և միջին գործարարության սրընթաց զարգացմանն ուղղված պետական երաշխիքային հիմնադրամների ստեղծումը, բնակարանային ապահովման ոլորտում սոցիալական բնակշինարարության ազգային ռազմավարության մշակումը և իրականացումը, երիտասարդ ընտանիքներին պետական երաշխավորությամբ ցածր տոկոսադրույքներով հիպոթեքային երկարաժամկետ վարկերի տրամադրումը զեղչային համակարգով, ծառայությունների մատուցման ոլորտի ազատականացումը' կոմունալ բնակարանային տնտեսության համակարգում, և այլն:

Պարոն Բաղդասարյան, ես Ձեր ընտրողն եմ, բայց կուսակցության 15-րդ ամյակին նվիրված միջոցառման ժամանակ հայտարարեցիք, թե 2013թ. նախագահական ընտրություններին պաշտպանելու եք Սերժ Սարգսյանի թեկնածությունը, ու ես հիասթափվեցի: Ինչո՞ւ չեք առաջադրում Ձեր թեկնածությունը:

Սկզբունքորեն ես վերահաստատել եմ 2013թ. նախագահական ընտրություններում գործող նախագահին պաշտպանելու մեր կուսակցության որոշումը, որը հայտնի է բավականին վաղուց: Պետք չէ հիասթափվել, քանի որ ժամանակը կտա բոլոր հարցերի պատասխանները:

Ձեր կուսակցությունում կա՞ն մարդիկ, որոնք հիմա պասիվ են, բայց դուք կնախընտրեիք, որ հիմա Ձեր կողքին լինեին և ակտիվ աշխատեին ինչպես ընդդիմության ժամանակ: Ինչո՞ւ Երևան քաղաքի ընտրությունների Ձեր համամասնական ցուցակի մարդկանցից ոչ ոք ընդգրկված չէ այս խորհրդարանական ընտրությունների ցուցակում:

Իհարկե, ցանկալի կլիներ, որ պասիվ մարդիկ այսօր առավել ակտիվ մասնակցություն ցուցաբերեին, սակայն մեր հիմնական թիմը մեր կողքին է և օրեցօր համալրվում է նորանոր համախոհներով: Ինչ վերաբերում է երկրորդ հարցին, ապա Երևան քաղաքի ընտրությունների համամասնական ցուցակի անձանցից առաջիկա խորհրդարանական ընտրությունների ցուցակներում ընդգրկված են ոչ թե մեկ, այլ մի շարք մարդիկ:

Հնարավո՞ր է քաղաքական դեբատների հրավիրեք Լևոն Տեր-Պետրոսյանին կամ Գագիկ Ծառուկյանին:

Քաղաքական դեբատները խիստ կարևոր են, սակայն նույնչափ կարևոր է թե ընտրություններին նախորդող ժամանակահատվածում, թե քարոզարշավի ընթացքում քաղաքակիրթ ընտրապայքարին հարիր հանդուրժողականության և կառուցողական երկխոսության մթնոլորտը: Մենք մշտապես հանդես ենք եկել նման մոտեցման դիրքերից, ինչը սակայն չի կարելի ասել մեր որոշ քաղաքական հակառակորդների մասին:

Եթե ՕԵԿ-ը չհատի 5 տոկոսի սահմանը, կցրե՞ք կուսակցությունը:

Այսօր արդեն 170 000 անդամներով, Հայաստանի Հանրապետության ողջ տարածքում ավելի քան 450 գործող գրասենյակներով, կայացած քաղաքական կառույցին ուղղված նման հարցադրումը անլուրջ եմ համարում:

Պարոնն Բաղդասարյան, ի՞նչ եք կարծում, արդյոք այն նորարարական գաղափարները և մոտեցումները տարբեր ոլորտներում, որոնք դուք առաջ եք քաշում, հասկանալի և ընկալելի կլինե՞ն հասարակության լայն շերտերի համար:

Մենք մշտապես ապավինել ենք մեր ժողովրդի իմաստնությանը, տարաբնույթ սադրանքներին չենթարկվելու և խոհեմ դիրքորոշում ցուցաբերելու կարողությանը: Բազմաթիվ հանդիպումներում ներկայացված մեր բոլոր նախաձեռնողական մոտեցումները ողջունվում են հասարակության լայն շերտերի կողմից: Այս առումով կարևոր է արդյունավետ քարոզարշավի կազմակերպումը, որպեսզի մեր ծրագիրը, մեր գաղափարները, մեր ցանկությունները առավելապես հասանելի և ընկալելի դառնան հանրապետության նույնիսկ ամենահեռավոր գյուղերում բնակվող մեր հայրենակիցների համար: Վերջին ամիսների ընթացքում հանրապետության ողջ տարածքում կուսակցության տարածքային կառույցների և ղեկավարության հետ մեր հանդիպումներում քննարկել ենք քարոզարշավի մարտավարությունը, և մեր քաղաքական թիմն արդեն վստահորեն տվել է քարոզարշավի մեկնարկը: