«Համայնքային սեփականություն հանդիսացող հողերը վարձակալության հանձնելու, այնուհետև ենթավարձակալությամբ հեռահաղորդակցության կայաններ տեղադրելու համար բջջային կապի ընկերություններին հանձնելու դեպքերի վերաբերյալ քննվող քրեական գործերով համայնքներին պատճառված վնասի չափը կազմում է 422 373 615 դրամ»,- «Հետք»-ի հարցմանն ի պատասխան տեղեկացնում է Քննչական կոմիտեն (ՔԿ)։

«Համայնքների ղեկավարները չեն ցանկանում լուծել բջջային կապի օպերատորների հետ կնքված պայմանագրերը» մեր հրապարակման շրջանակում ՔԿ-ից ցանկանում էինք տեղեկանալ, թե իրավապահների հաշվարկած ընդհանուր վնասից անցնող մեկ տարվա ընթացքում որքան գումար է վերականգնվել համայնքային բյուջե։

ՔԿ-ն տեղեկացնում է, որ մինչ օրս համայնքներին պատճառված վնասից վերականգնվել է 102 516 555 դրամը։ Վերականգնված գումարից համայնքային բյուջե մուտքագրվել է 24 450 082 դրամ, մնացածը պահվում է Քննչական կոմիտեի և դատախազության դեպոզիտ հաշիվներին մինչև քրեական գործերի քննության ավարտը։

ՔԿ-ի տեղեկացմամբ՝ ալեհավաքների վերաբերյալ հարուցվել է 58 քրեական գործ, մեղադրական եզրակացությամբ դատարան է ուղարկվել 7 քրեական գործ, 10 գործով քրեական գործի վարույթը կարճելու վերաբերյալ որոշում է կայացվել, 46 քրեական գործ գտվում է նախաքննության փուլում։ 

Այսպիսով, ալեհավաքների գործերով հաշվարկված 422 373 615 դրամ վնասից անցնող մեկ տարվա ընթացքում համայնքային բյուջե է վերականգնվել  24 450 082 դրամը։