Պաշտպանության եւ անվտանգության հարցերի մշտական հանձնաժողովի ապրիլի 9-ի նիստում երկրորդ ընթերցմամբ քննարկվեց ԱԺ «Լուսավոր Հայաստան» խմբակցության հեղինակած ««Զինվորական ծառայության եւ զինծառայողի կարգավիճակի մասին» ՀՀ օրենքում լրացում կատարելու մասին» օրենքի նախագիծը:

Հիմնական զեկուցող Աննա Կոստանյանը նշեց, որ օրինագծի վերաբերյալ Կառավարությունը ներկայացրել է տեխնիկական բնույթի առաջարկներ, որոնք ընդունվել են:

Առաջարկվում է օրենքի 22-րդ հոդվածը լրացնել նոր՝ 5.1 մասով: Ըստ այդմ, տրված տարկետման ժամկետի ավարտի օրվա դրությամբ միջին մասնագիտական կրթական ծրագրով ուսումնառությունը չավարտած, ավարտական կուրսում սովորող եւ պարտադիր զինվորական ծառայության զորակոչի ենթակա քաղաքացուն ՀՀ կառավարության որոշմամբ մեկ անգամ տրվում է տարկետում մինչեւ ուսումնառության ավարտի օրը ներառյալ, սակայն ոչ ավելի, քան նրա 20 տարին լրանալու օրը:

Հարակից զեկուցող Քրիստինե Պողոսյանը, կարեւորելով ներկայացված փոփոխության առաջարկը, նշեց, որ ինքը կարծում է, որ տարկետումը պետք է վերադարձվի, որպեսզի բանակում լինեն բարձրագույն կրթությամբ զինվորներ. «Նույնիսկ այն պարագայում, երբ դա համարվում է ռիսկային, մենք պետք է գնանք այդ քայլին»:

Օրենքի նախագիծը ստացավ դրական եզրակացություն եւ կքննարկվի ԱԺ լիագումար նիստում:

Լուսանկարում՝ ԱԺ պատգամավոր Աննա Կոստանյանը