![](/static/articles/01/29/95/l-LH4TVgjVhq.jpg)
«Հայացք». ԵԽԽՎ դիտորդների «կույր» դիտարկումներն ու անհամ հումորը
Ապրիլի 11-12-ը նախընտրական տրամադրության մեջ գտնվող Հայաստանում կարճաժամկետ դիտորդական առաքելություն իրականացրած ԵԽԽՎ դիտորդները որևէ մտահոգիչ խնդրի չեն առնչվել: Այս մասին երեկ ուշ երեկոյան լրագրողների հետ հանդիպման ժամանակ անձամբ ասաց ԵԽԽՎ նախընտրական պատվիրակության ղեկավար բարոնուհի Նիքոլսոնը:
Իհարկե, նրանց «ականջին հասել են» շշուկներ հնարավոր բազմապիսի խախտումների մասին, մասնավորապես, որ քվեատուփերում կարող են հայտնվել այնպիսի մարդկանց քվեներ, ովքեր կամ կենդանի չեն, կամ վաղուց արդեն Հայաստանում չեն բնակվում:
Լրագրողներն էլ բազմապիսի հարցերի միջոցով փորձեցին գնահատումներ ստանալ այն մասին, որ հիմնական խախտումներն ու կեղծիքներն արվում են մինչ բուն ընտրությունները՝ ընտրակաշառքի, պարտադրանքի ու ստորագրությունների կորզման միջոցով: Ընտրության օրն էլ դիտորդներն ընտրատեղամասերում լինում են ընդամենը 1-2 ժամ, և այն, ինչ պետք է արվի, արվում է նրանցից հետո կամ առաջ:
Բարոնուհի Նիքոլսոնը, սակայն, ասաց, որ արտասահմանյան դիտորդներն այս անգամ մի քանի 100 են լինելու` գումարած հազարավոր տեղական դիտորդները:
«Ինձ ավելի շատ մտահոգում է, որ այդքան շատ մարդու մեջ կարող է ընտրողներին ընտրատեղամասերում տեղ չմնալ»,- փորձեց կատակել նա:
Ընտրակաշառքի մասին ոչ մի խոսք չեղավ՝ չնայած այդ մասին հնչած հարցերին:
Փորձեցինք նաև պարզել, թե ինչ հետևություններ են արվել նախորդ ընտրություններից և մարտի 1-ի դեպքերից, այն դեպքում, երբ նույն միջազգային դիտորդները շտապել էին ասել, թե ընտրությունները նորմալ ընթացք են ունեցել:
«Դուք փնտրում եք արյուն, ամպրոպ, գետնին թափված մարմնի մասեր»,- կրկին փորձեց կատակել տիկինը՝ իր ծիծաղը միացնելով պատվիրակության մյուս անդամների ծիծաղին: Հետո ակնարկեց, թե ընտրություններից հետո էլ «մեզանից ծայրահեղ գնահատումներ մի սպասեք»:
«Լավ ընտրությունների չանցկացման պատասխանատվության ողջ բեռը չի կարելի դնել ազգությամբ ոչ հայերի վրա: Դա ձեր ազգի խնդիրն է»,- ասաց պատվիրակության ղեկավարը:
Մեկնաբանել