«Հայացք». հարկայինները հարկերը նախօրոք են պահանջում
«Հարկայիններն ամեն րոպե մտնում ու քրքրում են, նույնիսկ ժամանակից առաջ են ընկնում, թե մի քանի ամսվա հարկերը նախապես մուծեք, որ բյուջե լցվի: Նրանք խեղդել են բիզնեսն ու տեղական արտադրությունը»:
Ասվածը նորություն չէ, ուղղակի այս անգամ բարձրաձայնվելու համար նոր հարթակ է գտել՝ Հայաստանի կոմունիստական կուսակցության քարոզարշավի ամբիոնը: Որ հարկային վարչարարության փոփոխությունը հրատապ է, ընդգծել է նաև ՀԿԿ կենտկոմի առաջին քարտուղար Ռուբեն Թովմասյանը՝ հիշելով. «Խորհրդային տարիներին Հայաստանը 130 տեսակի արտադրանք էր արտադրում: Հայաստանից գալիս կոշկեղեն էին խնդրում, լատեքս էին խնդրում, «Նաիրիտի» արտադրանքն էին խնդրում...»:
Այնպես չէ, որ ընկեր Թովմասյանի պահանջած հարկային վարչարարության փոփոխությունը իշխանությունների սրտով չէ, ուղղակի նրանց պատկերացրած բարելավումն այլ բան է ենթադրում. ընկեր Թովմասյանի ասած «քրքրելն» է նոր ձևեր ու երանգներ ստանում:
Ասվածի վառ օրինակներից մեկը «Հայացք»-ին ներկայացրեց Ջերմուկում աշխատող տնտեսավարողներից մեկը:
«Ամիսը մեկ, 2 ամիսը մեկ գալիս են թե' «դե մի 20 հազար ավել տուր, էլի»: Ասում եմ՝ ախպեր ջան, մի թիզ խանութ ունեմ, ձեռքս բերանս չտարած՝ արդեն բկիս ես կանգնում, ես ո՞նց անեմ: Էս երիտասարդ տեսուչն էլ թե' «նենց չանես՝ վրադ ստուգում բացեմ: Տակից դուրս չես գա»: Տո բա ի՞նչ անեի՝ թքեցի, թողեցի խանութը: Դե թող գնան ստուգեն Երևանի սուպերմարկետներում, որ հաստատ ստուգելու լիքը բան ունեն»,- վրդովված պատմում էր քաղաքացին:
Մեկնաբանել