![](/static/articles/01/29/97/l-EbOppuUD1x.jpg)
«Հայացք». եկավ մի կուսակցություն՝ լույսի պես ամբողջովին մաքուր, և անոր դրոշմն էր՝ ՕԵԿ
Արթուր Բաղդասարյանը խիստ ոգևորվել է նախագահի կողմից իրենց «բարոյական» որակելուց ու նույնիսկ հավատացել է Ազատության հրապարակում օրերս ՕԵԿ-ի կազմակերպած հանրահավաքում այդ կուսակցության առաջնորդ Արթուր Բաղդասարյանը, ոչ ավել, ոչ պակաս, հայտարարել, պնդել է. ««Օրինաց երկիր» կուսակցությունը լույսի պես մաքուր է: Մենք կապ չունենք Հայաստանում թալանի, կողոպուտների, արյան հետ»:
Սա լսելուն պես միանգամից փակեցի աչքերս, մտածեցի, թե մեկ էլ տեսար' ոչ միայն լույսի պես մաքուր եղան, այլև լուսատու և այնքան ուժեղ, որ հնարավոր է' մարդ կուրանա: Հետո կամաց-կամաց համարձակություն ձեռք բերելով' բացեցի աչքերս, և շուրջբոլորս լույսի պես մաքուր կուսակցություն չտեսա: Անմիջապես կասկածեցի, թե տեսողությանս հետ կապված ինչ-որ խնդիր է առաջացել. ախր, առաջնորդի ասածն ինչպե՞ս կարող է ճիշտ չլինել:
Անմիջապես վազեցի օպտիկական ակնոցների մոտակա վաճառանոց, գնեցի և՛ կարճատեսի, և՛ հեռատեսի համար նախատեսված ամենազորեղ ակնոցները, բայց, ցավոք, ո՛չ մեկը օգնեց, ոչ էլ մյուսը. ինչ-որ չհաջողվեց հրեշտակի թևեր տեսնել Արթուր Բաղդասարյանի կամ ՕԵԿ-ի ուսերին:
Դյուրահավատության համար սկսեցի մեղադրել ինքս ինձ. ախր, էն գլխից գիտեի, որ ՕԵԿ-ը երբեք էլ համեստությամբ չի փայլել: Եթե չենք սխալվում, անգամ Աստված կամ Քրիստոս ինքը լույսի պես մաքուր լինելով' ինքն իրեն լույսի պես մաքուր չի համարել: Եվ եթե մահկանացուներից բաղկացած կուսակցությունն է այդպիսին ներկայացվում, դա արդեն մեղք գործելու պես մի բան է:
Ինչ վերաբերում է թալանի խնդրին' դա, կարծում ենք, առանձին թեմա է: Արյան հետ կապ չունենալու հայտարարության վերաբերյալ էլ ՀՀԿ-ի կարծիքն է հետաքրքիր. երևի մի օր կարձագանքեն և Արթուր Բաղդասարյանին կհարցնեն' դրանով ի՞նչ ես ուզում ասել, իսկ ո՞ր կուսակցությունը կապ ունի...
Մեկնաբանել