Նորաստեղծ «5165» ազգային շարժումն այսօր՝ ապրիլի 25-ին, անցկացրեց իր անդրանիկ համագումարը, որի ընթացքում ներկայացվեցին շարժման նպատակները և գաղափարախոսությունը։

Շարժման տարածած հաղորդագրության համաձայն՝ Արարատ լեռան բարձրությունն անվանում ընտրած շարժումը ազգային ու պետականամետ ծրագրերով ու գաղափարներով լի մարդկանց համար է։  Նպատակն է միասնությամբ կերտել հզոր և կենսունակ Հայաստան։

Խոսելով «5165» շարժման ստեղծման կարևորության և նպատակների մասին, շարժման հիմնադիր Կարին Տոնոյանն իր բացման խոսքում մասնավորապես ասաց.

«Շարժման նպատակն է համախմբել բոլոր այն նվիրյալներին, բոլոր այն արհեստավարժ հայորդիներին և ՀՀ քաղաքացիներին՝ անկախ ազգային պատկանելիությունից, որոնք շատ լավ հասկանում են այն իրավիճակը, որի մեջ գտնվում է մեր հայրենիքը, որոնք պատրաստ են համախմբելու և մեր երկիրը հանելու այս խորը ճգնաժամից, որոնք ունեն հավատ, կամք՝ վերակերտելու Հայաստանը, որոնք չեն ուզում մնալ առանց հայրենիք և համալրել այն ազգերի շարքը, որոնք կան, բայց հայրենիք չունեն: Մեր երկրի ապագան վտանգված է և մեր պարտքն է կանգնեցնել այդ վտանգը: Մեզ դրել են մի իրավիճակում, որ մենք ստիպված ենք ընտրություն կատարել այնպիսի ուժերի միջև, որոնք երկիրը hասցրել են այս օրին և ուզում են հավատացնել ժողովրդին, որ ուրիշ ուժեր չկան, բայց այդ ուժերը կան: Նրանք այն մարդիկ են, ովքեր տարիներ շարունակ իրենց գործն են արել՝ համոզված լինելով, որ հայրենիքին ծառայում են գործ անելով»:

«5165» շարժման գաղափարախոսական հենքերի, ազգային նպատակի և երկրի զարգացման գործում կրթության դերի մասին խոսեց շարժման համահիմնադիր, միջազգային հարաբերությունների մասնագետ, ԵՊՀ դոցենտ, պատմական գիտությունների թեկնածու Մենուա Սողոմոնյանը: Նրա խոսքով՝ արդեն 30 տարի է, ինչ անկախ պետություն ունենք, սակայն այդպես էլ չենք ձևակերպել մեր ազգային նպատակը, ինչի պատճառով էլ ունենք պառակտված հասարակություն, ձախողված պետություն, գոյութենական շոշափելի սպառնալիք, շարունակվող արտագաղթ, տնտեսական: Նա հարցադրում արեց՝ ո՞րն է ազգային նպատակը, ո՞վ և ինչպե ՞ս է այն ձևակերպում:

««5165» շարժումը հանձն է առնում տալ այս հարցերի պատասխանը, դրանց վերաբերյալ հանրային համաձայնություն ստանալու պարագայում, համախմբել Հայաստանի, Արցախի Հանրապետությունների քաղաքացիներին, այլ պետություններում մեր ազգակիցներին այդ նպատակի շուրջ և կերտել ազգային հզոր ու կենսունակ պետություն կառուցելու ուղին: Մեր պատկերացմամբ հայոց ազգային նպատակն է կերտել այնպիսի պետություն, որը կլինի միջազգային իրավունքի այնպիսի դերակատար, որն ունակ է իր ազգային շահերի ներքո ապահովել իր քաղաքացիների անվտանգության և զարգացման նպատակները, երաշխավորել մրցունակ պետություն դառնալու առաջնահերթությունը: Այնպիսի պետություն, որը հայանպաստ դիրքերից կհասնի Արցախի հիմնահարցի լուծմանը՝ ապահովելով այնտեղի բնակչության անկախության իրավունքը: Պետություն, որն ունակ կլինի արդյունավետ հակակշռել Թուրքիայից եկող գոյութենական սպառնալիքներին՝ ունենալով վերջինիս զսպման ռազմական և դիվանագիտական գործուն մեխանիզմներ, այնպիսի պետություն, որը հայերի ոտնահարված իրավունքները և արդարությունը վերականգնելու երկարաժամկետ ռազմավարություն մշակելու և իրականացնելու հնարավորություն կունենա»,-նշեց Մենուա Սողոմոնյանը:

Շարժման համահիմնադիր Հովհաննես Ղազարյանն էլ անդրադարձավ պետական մտածողության և արդյունավետ կառավարմանն հիմնահարցերին։ Նա կարևորեց այն հանգամանքը, որ «5165» շարժման անկյունաքարը համերաշխությունն ու համախմբումն է: Համախմբումն անհրաժեշտ է համազգային խնդիրներ լուծելու համար: Նա շեշտեց, որ արդյունավետ կառավարման գլխավոր նախապայմանը սեփական ես-ը մի կողմ դնելն է:

Շարժման համահիմնադիր, ՀՀ վաստակավոր արտիստ Արսեն Գրիգորյանը էլ շեշտեց, որ շարժումն անհրաժեշտությունից է ծնվել։ Գրիգորյանը փաստեց, որ ինքը երբեք անձամբ չի ցանկացել մտնել քաղաքականություն, բայց հիմա մշակույթով պայքարը քիչ է, քանի որ մեր երկիրն ուզում են խլել մեզնից։

«Մեր երկիրը, որն ունի նման մշակույթ, իրավունք չունի չունենալ առանձին մշակույթի նախարարություն։ Հատկապես հիմա, երբ ոչ միայն Թուրքիայի, այլ նաև Ադրբեջանի վերահսկողության տակ են մնացել շատ մշակութային կոթողներ։ Դարեր շարունակ մեր մշակույթը՝ պետականության դեր ստանձնած, պահել է մեզ, իսկ այժմ մենք պետք է պահենք մեր մշակույթը։ Բոլոր խնդիրներին պետք է հասցեական մոտեցում և լուծում գտնենք։ Մյուս կարևոր հարցը հայրենադարձությունն է։ Մենք, որպես պետություն, նեղացրել ենք մեր սփյուռքին։ Պետք է փոխենք մեր վերաբերմունքը մեր աշխարհասփյուռ հայրենակիցների նկատմամբ։ Սփյուռքը դրամի քսակ չէ, այն միայն հայրենիքը ծանր պայմաններում փրկելու օղակ չէ։ Սփյուռքը փորձում է իր հնարավորության սահմաններում օգնել իր հայրենիքին։ Սփյուռքահայը այլևս դիտորդ չպիտի լինի. նա պետք է հայրենիքում տուն ունենա։ Մենք պարտավոր ենք պետական երաշխավորություն և արտոնություններ ստեղծել բոլոր հայրենադարձների համար։ Հարկավոր է մշակել հատուկ նախագծեր, օրինակ՝ նոր ավաններ կառուցելով լուծել բնակեցման հարցը,տարածքներ շատ ունենք, արտոնյալ պայմաններ ստեղծենք տնտեսական գործունեություն ծավալելու համար»,- հավելեց Արսեն Գրիգորյանը։

Հաջորդիվ ՀՀ սահմանադրաիրավական հիմնախնդիրներին անդրադարձավ իրավաբան, տնտեսագետ Վարդան Քալանթարյանը։

Հատկապես 2020-ի ընթացքում տարբեր մարտահրավերների ու խնդիրների առաջ կանգնած առողջապահական ոլորտի մասին խոսեց շարժման հիմնադիր անդամ, բժիշկ Գևորգ Թամամյանը։

Հզոր պետության ամրացման գործում տնտեսության հզորացման կարևորության մասին ելույթ ունեցավ տնտեսական գիտությունների թեկնածու Աշոտ Պետրոսյանը։

Հիշեցնենք, որ «5165» շարժումն իր գործունեության մեկնարկն ազդարարեց 22.04.21-ին, ինչի մասին շարժման ֆեյսբուքյան պաշտոնական էջում տարածված տեսաուղերձում հայտնեց «Հայ Ասպետ» կրթադաստիարակչական բարեգործական հիմնադրամի տնօրեն, «Որդուս» հասարակական կազմակերպության տնօրեն, «5165» շարժման հիմնադիր Կարին Տոնոյանը: Շարժմանը կարող է միանալ յուրաքանչյուր անհատ, ով ունի նոր ու կառուցողական գաղափարներ, կիսում է նաև շարժման գաղափարները, ընդունում է շարժման դրույթները: Անդամակցությունն իրականացվում է երկու ձևաչափով՝ շարժման անդամ և աջակից: