Իսլամիստները Մալիում առևանգել են ֆրանսիացի լրագրողի
Մալիում իսլամիստներն առևանգել են ֆրանսիացի լրագրող Օլիվիե Դյուբուային։ Այդ մասին չորեքշաբթի օրը՝ մայիսի 5-ին «Թվիթերի» իր միկրոբլոգում գրել է «Լրագրողներ առանց սահմանների» միջազգային իրավապաշտպան կազմակերպության գլխավոր տնօրեն Քրիստոֆ Դելուարը։ Ֆրանսիայի արտաքին գործերի նախարարության աղբյուրը լուրը հաստատել է Reuters գործակալությանը՝ նշելով, որ ֆրանսիական արտաքին քաղաքական գերատեսչությունն արդեն իսկ կապ է հաստատել Դյուբուայի ընտանիքի հետ։ Բացի այդ, Ֆրանսիայի ԱԳՆ-ն ուսումնասիրում է սոցիալական ցանցերում հայտնված 21 վայրկյանանոց տեսանյութը, որտեղ լրագրողը պատմում է իր առևանգման մասին։
Une vidéo de 21 secondes montre le journaliste français Olivier Dubois affirmant qu’il a été kidnappé le 8 avril 2021 par le « Groupe de soutien à l’islam et aux musulmans ». Il s’adresse à sa famille, ses amis et aux autorités pour qu’ils fassent leur possible pour sa libération pic.twitter.com/MLqYwCUjRD
— Christophe Deloire (@cdeloire) May 5, 2021
Դյուբուային առևանգել է «Իսլամի և մուսուլմանների աջակցության խումբ» ահաբեկչական խմբավորումը, որը սերտ կապեր ունի «Ալ Քաիդայի» հետ։ Դելուարի խոսքերով՝ լրագրողն առևանգվել է ապրիլի 8-ին՝ Մալիի հյուսիս-արևելքում գտնվող Գաո փոքր քաղաքում, որտեղ ռեպորտաժներ էր պատրաստում։ Նույն օրը լրագրողը, որը «լավ գիտեր Մալիի այդ վտանգավոր շրջանը», ճաշից հետո չի վերադարձել հյուրանոց։
«Լրագրողներ առանց սահմանների» միջազգային իրավապաշտպան կազմակերպությունը Դյուբուայի անհետացման մասին տեղեկացել է ապրիլի 10-ին, սակայն որոշել է չհայտարարել այդ մասին՝ հույս ունենալով, որ առևանգված լրագրողը ազատ կարձակվի։ Դելուարը Մալիի և Ֆրանսիայի իշխանություններին կոչ է արել անել հնարավորը՝ լրագրողի ազատ արձակման համար։
Լուսանկարը՝ RSF-ի
Մեկնաբանել