Թուրքիայի Արտաքին գործերի նախարարությունը քննադատել և անօրինական է անվանել հինգշաբթի օրը՝ մայիսի 6-ին Լատվիայի խորհրդարանի կողմից Հայոց ցեղասպանության ճանաչման փաստը։ Այդ մասին նշվում է Թուրքիայի արտաքին քաղաքական գերատեսչության պաշտոնական կայք էջում։

«Լատվիայի խորհրդարանի կողմից այսօր ընդունված որոշումը, որով 1915 թվականի իրադարձությունները որակվում են որպես «ցեղասպանություն», չհիմնավորված փորձ է քաղաքական դրդապատճառներից ելնելով վերաշարադրել պատմությունը։ Մենք մերժում և հաստատապես դատապարտում ենք այդ անօրինական որոշումը»,- հայտարարել է Թուրքիայի ԱԳՆ-ն։

Թուրքական արտաքին քաղաքական գերատեսչությունը ընդգծել է, որ «միջազգային իրավունքի տեսանկյունից հիմքեր չկան 1915 թվականի իրադարձություններն անվանել ցեղասպանություն» և Լատվիայի օրենսդիրների որոշումն այդ թեմայի վերաբերյալ երկակի ստանդարտների դրսևորման օրինակ է։ «Մենք Լատվիայի խորհրդարանին առաջարկում ենք ուղղել այդ սխալը և աջակցել տարածաշրջանում, հատկապես թուրք և հայ ժողովուրդների միջև խաղաղ գոյակցությանն ուղղված ջանքերին»,- նշվում է հայտարարության մեջ։

Հիշեցնենք, որ մայիսի 6-ին Լատվիայի խորհրդարանը 58 կողմ ձայնով ճանաչել և դատապարտել էր Հայոց ցեղասպանությունը։ Լիտվայում, Լատվիայում և Էստոնիայում ՀՀ դեսպան Տիգրան Մկրտչյանը ֆեյսբուքյան գրառմամբ հայտնել էր, որ դա «վերջին տարիների աշխատանքի արդյունք է, որտեղ էական է եղել դիվանագիտության զինանոցի գրեթե ողջ պաշարի կիրառումը՝ քաղաքական ինտենսիվ շփումները, խորհդարանական դիվանագիտությունը, մշակութային դիվանագիտությունը, համայնքային և Հայ առաքելական եկեղեցու ներգրավվածությունը»։

Դեռևս 2020 թվականի ապրիլի 24-ին Լատվիայի խորհրդարանի երկու ուժեր, որոնք նաև իշխող կոալիցիայի անդամներ են՝ «Նոր պահպանողականների» և «Զարգացմանը՝ Այո՛» կուսակցություններն արդեն արել էին Հայոց ցեղասպանությունն ընդունող և դատապարտող հայտարարություններ։ Այս ուժերի, ինչպես նաև «Համաձայնություն» կուսակցության ներկայացուցիչների մեծ մասի նախաձեռնությամբ էլ 2021 թվականի փետրվարից սկսվել է Հայոց ցեղասպանության ճանաչման գործընթացը, որի արդյունքում բանաձև-հայտարարություն էր ներկայացվել ապրիլի 23-ին։ Ապրիլի 29-ին նախնական բանաձևի տարբերակը առարկություններով հետաձգվել էր մեկ շաբաթով։ Բանաձևի փոփոխված տարբերակն առաջարկել էր Լատվիայի խորհրդարանի Արտաքին հարաբերությունների մշտական հանձնաժողովը։

Լուսանկարը՝ Թուրքիայի ԱԳՆ մամուլի ծառայության