Արմավիրի մարզի Նոր Արտագերս համայնքում կարևոր բոլոր կառույցները  կենտրոնացած են մեկ շենքում: Գրադարանը, մանկապարտեզը, բուժամբուլատորիան գտնվում են նախկին կոլտնտեսությանը պատկանող շենքերից մեկում, որտեղ տեղակայվել է նաև համայնքապետարանը: Առանձին մուտքով նույն շենքում է տեղակայված նաև փոստային բաժանմունքը:

Գյուղի կենտրոնական ճանապարհի վրա վեր են խոյանում մի քանի շենքեր, որոնք թալանված են ու գտնվում են անմխիթար վիճակում: Հենց այդ շենքերում են խորհրդային տարիներին առանձին-առանձին գործունեություն ծավալել մշակույթի տունը, մանկապարտեզը: Անկախությունից հետո շենքերը մատնվել են անուշադրության և ամբողջությամբ թալանվել են:

Համայնքի մշակույթի տունը կառուցվել է 1953թ. և չի գործում անկախությունից ի վեր: Վերանորոգման համար նույնիսկ նախահաշիվ չի կազմվել, քանի որ համայնքապետ Խաչատուր Զանազյանի ասելով՝ վերանորոգումն իրենց ուժերից վեր է:

«Ներսում գույք չկա, ոչինչ չկա, միայն շենքն է: Մեր համայնքի ամենացավոտ կողմերից մեկն է, որ մշակույթի տուն չունենք: Միջոցառումներն իրականացնում ենք բացօթյա տարածքում կամ դպրոցի դահլիճում»,- ասում է Խաչատուր Զանազյանը:

Նույն վիճակում է գտնվում նաև մանկապարտեզի շենքը: Այն կառուցվել է 1945թ.: Շենքը վթարային վիճակում կապիտալ վերանորոգման կարիք ունի: Քանի որ վերանորոգումը համայնքի համար թանկ հաճույք է, ստիպված՝ 50 երեխայի համար նախատեսված մանկապարտեզի խմբակ են բացել համայնքապետարանի շենքում:

Մոտ 4 մլն դրամ է ներդրվել նոր մանկապարտեզ բացելու համար: Գույքը գնել են բարերարները, ինչը թեթևացրել է համայնքի հոգսը:

Խաչատուր Զանազյանն ասաց, որ համայնքապետարանը չի մասնակցում սուբվենցիոն ծրագրերին, քանի որ ֆինանսապես լավ վիճակում չեն: Բացի այդ, սուբվենցիոն ծրագրերն ավելի թանկ են համայնքապետարանի համար, քան առանձին ծրագրերի իրականացումը:

«Սուբվենցիոն ծրագրերի 1 դրամի գործը գլխներիս դառնում է 3 դրամ: Եթե սուբվենցիայով անեի, նույնիսկ մանկապարտեզը չէինք կարողանա աշխատացնել»,- հավելեց Նոր Արտագերսի համայնքապետը:

Նշենք, որ Նոր Արտագերս համայնքը հիմնադրվել է 1866թ.-ին: Համայնքի նախկին անվանումը մինչև 1966թ., եղել է Փոքր Շահրիար: Բնակիչների նախնիները գաղթել են Կողբից, Սասունից և Սուրմալուից: Ներկայում համայնքում ապրում են հայեր, եզդիներ, ասորիներ:

Համայնքապետն ասում է, որ հատկապես ազգային փոքրամասնությունների դեպքում, անհրաժեշտություն է մշակութային հաստատություն ունենալը, որպեսզի վերջիններս նույնպես միջոցառումներ կազմակերպեն, պահպանեն իրենց ազգային ավանդույթները:

Համայնքում չկան նաև կրոնական կառույցներ: Դեռևս 2016թ.-ին Նոր Արտագերսում սկսվել են մատուռի կառուցման աշխատանքները՝ համայնքի բյուջեի միջոցներով և բնակիչների հանգանակությամբ: Նախատեսվում էր շինարարությունն ավարտել 2018թ. առաջին կիսամյակին, սակայն մինչ օրս անավարտ է:

Պարզվում է՝ մատուռը կառուցում են հենց մշակույթի տան դիմաց, ինչի թույլտվությունը պատկան մարմինների կողմից չի հաստատվում: Խ. Զանազյանն ասաց, որ մշակույթի տան շենքն ընդգրկված է հուշարձանների պահպանության գործակալության ցանկում, ինչն էլ դժվարություն է առաջացնում մատուռի կառուցման աշխատանքների ավարտի համար: