Կառավարության այսօրվա նիստում հաստատվեց «Նախադպրոցական կրթության պետական կրթական չափորոշիչը»։ Այն ընդունվեց միաձայն, զեկույցով հանդես եկավ ԿԳՄՍ նախարարի պաշտոնակատար Վահրամ Դումանյանը։

Նախագծով առաջարկվում էր վերանայել «Նախադպրոցական կրթական չափորոշիչները»` հիմնվելով «Հանրակրթության պետական չափորոշչի» վրա՝ ապահովելով սահուն անցում նախադպրոցական մակարդակից դեպի տարրական դպրոց։ Այս մասին նիստի ընթացքում ասաց նախարարի պաշտոնակատարը։

Նրա խոսքով՝ չափորոշիչը սահմանում է նախադպրոցական տարիքի երեխաներին ներկայացվող որակական պահանջները, կրթական ծրագրերի բովանդակությունը, ներկայացվող վերջնարդյունքները, ուսումնական բեռնվածության առավելագույն ծավալը։

Չափորոշչի համար թիրախային խումբ են համարվում 0-6 տարեկան երեխաները, որի մեջ են մտնում նաև մսուրներ այցելողները։ Նախարարի խոսքով՝ մսուրը դառնում է որպես երեխային կրթելու միջավայր։

Նախադպրոցական կրթության պետական կրթական չափորոշիչը ներառում է՝

1) ուսումնադաստիարակչական հիմնական բնագավառները, կրթական ծրագրի բաղադրիչները և դրանց սահմանման մանկավարժահոգեբանական սկզբունքները.

2) երեխաների ուսումնական, խաղային բեռնվածության առավելագույն չափը կամ դրանց հարաբերակցությունը.

3) երեխաների զարգացման ընթացքի և առաջադիմության մակարդակի դիտարկման ձևերը.

4) նախադպրոցական ուսումնական հաստատություններում ներառական և երեխայակենտրոն միջավայրի չափանիշները, որոնք հաստատում է կրթության պետական կառավարման լիազորված մարմինը.

5) նախադպրոցական ուսումնական հաստատություններում երեխայի անվտանգ միջավայրի և աղետներին պատրաստվածության չափանիշները:

Ըստ որոշման՝ չափորոշիչը հանդիսանում է երեխայակենտրոն կրթության հիմքը. հնարավորություն է ընձեռում արձագանքելու երեխաների կարիքներին և հետաքրքրություններին, հարգելու յուրաքանչյուր երեխայի անձը, խթանելու համատեղ ուսումնառության գործընթացը:

Նախադպրոցական կրթության պետական կրթական չափորոշչի իրականացումը նախադպրոցական ուսումնական հաստատությունների կողմից պարտադիր է՝ անկախ դրանց կազմակերպաիրավական ձևից և ենթակայությունից:

Սահմանվում է, թե ինչ կարողություններ, գիտելիք պետք է ունենա նախադպրոցական հաստատություններում սովորող երեխան։ Նախադպրոցական կրթության կարողություններից են լեզվական և հաղորդակցական կարողունակություն, ճանաչողական և մոտիվացիոն կարողունակություն, ինքնաճանաչողական և սոցիալական կարողունակություն, ժողովրդավարական և քաղաքացիական կարողունակություն, մաթեմատիկական, տեխնիկական, ֆիզիկական, խոսքի և հաղորդակցության կարողություն և այլն։ Չափորոշչով նախատեսված է, թե որ տարիքային խմբում ինչ կարողություններ ու հմտություններ պետք է ունենա երեխան։

Նախադպրոցական կրթության չափորոշչում ներառված է նաև՝ ինչպես պետք է ձևավորել ծրագրի բովանդակությունը։