Մոսկվայում ԱՄՆ դեսպանության մամուլի քարտուղար Ռեբեկա Ռոսը կարտաքսվի Ռուսաստանից։ Այդ մասին գրում է «Коммерсант»-ը։ Վերջինիս տվյալներով՝ Ռոսն այն 10 դիվանագետների ցանկում է, որոնց արտաքսման մասին հայտարարվել է այս տարվա ապրիլի 21-ին։ Ամերիկացի այդ դիվանագետները մեկ ամսվա ընթացքում պետք է լքեն Ռուսաստանի Դաշնությունը։

ՌԴ ԱԳՆ-ից «Коммерсант»-ին հայտնել են, որ Ռոսի արտաքսումը պայմանավորված է ԱՄՆ գործողություններով, որն արդեն կես տարուց ավելին Ռուսաստանին հնարավորորություն չի տալիս Վաշինգտոնի իր դեսպանությունում նշանակել մամուլի քարտուղար։ 

«Վաշինգտոն չեն թողնում այն մարդուն, որը մեր կողմից նշանակվել է մեր դեսպանության մամլո քարտուղարի պաշտոնում, ընդ որում առանց որևէ պատճառ մատնանշելու։ Խոսքը գնում է մեծ փորձով դիվանագետի մասին, որն ավելի վաղ համանման պաշտոններ է զբաղեցրել ՌԴ այլ դեսպանություններում։ Իսկ ԱՄՆ-ն ուղղակի վերադարձրել է այդ անձի փաստաթղթերը՝ նույնիսկ չմեկնաբանելով իր հրաժարման պատճառը։ Այնպես որ սա ռուսական նախաձեռնություն չէ»,- նշել են Ռուսաստանի արտաքին քաղաքական գերատեսչությունից։ 

TACC գործակալությանը Ռոսը հաստատել է իր արտաքսման լուրը։ 

Մոսկվայում ամերիկյան դեսպանության 10 աշխատակիցների արտաքսումը դարձել է ռուսական կողմի պատասխանը ԱՄՆ նոր պատժամիջոցներին։ Բացի դիվանագետների արտաքսումից, Ռուսաստանը, մասնավորապես, ԱՄՆ դիվանագիտական ներկայացուցչությանը արգելել է վարչատեխնիկական պաշտոնների զբաղեցման համար վարձել Ռուսաստանի կամ երրորդ երկրի քաղաքացիներին։ Ավելի վաղ, ԱՄՆ-ն Ռուսաստանում իր դեսպան Ջոն Սալիվանին հրավիրել էր Վաշինգտոն՝ քաղաքական խորհրդակցությունների և իրավիճակի քննարկման համար։

Լուսանկարը՝ Twitter/ USEmbRuPress