«Հայ ազգային կոնգրես» կուսակցության 3-րդ համագումարի ժամանակ առաջին նախագահ Լևոն Տեր-Պետրոսյանը հայտարարեց, որ ՀԱԿ-ի՝ առաջիկա ընտրություններին մասնակցելու հարցը կորոշի նոր ձևավորվող վարչությունը։

Եթե վարչությունը որոշի, որ ՀԱԿ-ը մասնակցելու է ընտրություններին, ապա կուսակցության ընտրական ցուցակը կգլխավորի ինքը։ «Եթե վարչությունը որոշի մասնակցել ընտրություններին, ապա ինքնըստինքյան հասկանալի է, որ Կոնգրեսի ցուցակը գլխավորելու պարտավորությունը ջարդվելու է իմ գլխին»,- հայտարարեց առաջին նախագահը։

ՀԱԿ համագումարի պատվիրակներն այսօր ընտրում են վարչության նոր կազմ, որը բաղկացած է լինելու 35 հոգուց։ Վարչության անդամների թեկնածուները 59-ն են։

Առաջին նախագահը համագումարի մասնակիցներին միացավ օրվա երկրորդ կեսին։ Ներողություն խնդրեց, որ նստած է ելույթ ունենալու՝ պատճառաբանելով, որ վատառողջ է: Մինչ այդ նա վարակվել էր կորոնավիրուսով։

Նախապես պատրաստած ելույթը հարցուպատասխանի ձևաչափով էր։ Ընթերցում էր հարցերը և պատասխանում դրանց։ Ելույթում առաջին նախագահը անդրադարձավ պատերազմի պատճառների, պարտության, ստեղծված իրավիճակից ելքերի, նախկին նախագահներ Սերժ Սարգսյանի և Ռոբերտ Քոչարյանի հետ միասնաբար Նիկոլ Փաշինյանի դեմ պայքարի և ՀԱԿ-ի՝ ընտրություններին մասնակցելու հարցերին։

Լուսանկարը՝ Անի Սարգսյանի