Ազգային ժողովի Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովը բացասական եզրակացություն տվեց «Սահմանամերձ համայնքների սոցիալական աջակցության մասին» օրենքում փոփոխություն կատարելու պատգամավորներ Սոֆիա Հովսեփյանի, Թագուհի Թովմասյանի և Աննա Գրիգորյանի օրենսդրական առաջարկին: Պատգամավորներն առաջարկում էին օրենքով ամրագրել, որ Հայաստանի սահմանամերձ համայնքների վարչական տարածքում գտնվող գյուղատնտեսական նշանակության հողերում աճեցված բուսաբուծական արտադրանքը ենթակա է երաշխավորված գնման պետության կողմից՝ Կառավարության կողմից սահմանված կարգով՝ երաշխավորված գնման պայմանագրի հիման վրա:

Ըստ նախագծի` երաշխավորված գնման ենթակա բուսաբուծական արտադրանքի տեսակները, դրանց որակական չափանիշները, երաշխավորված գնման պայմանագրի օրինակելի ձևը, ինչպես նաև երաշխավորված գնման ենթակա արտադրանքի միավորի գինը, յուրաքանչյուր տարվա համար՝ մինչև նախորդ տարվա սեպտեմբերի 1-ը, սահմանում է Կառավարությունը:

Նախագծի համահեղինակ Սոֆիա Հովսեփյանն իր խոսքում նշեց, որ այս փոփոխություններով նախատեսել են կանխել սահմանամերձ համայնքներից արտահոսքն այլ բնակավայրեր: Պատգամավորի խոսքով` վերջին պատերազմից հետո նման համայնքների թիվն ավելացել է:

«Որպեսզի կանխենք այն արտահոսքը սահմանամերձ համայնքներից, որոնք ունեցել ենք 90-ականների պատերազմից հետո, նախատեսում ենք հնարավորություն տալ բնակիչներին զբաղվելու գոնե իրենց մինիմալ հնարավորությունների սահմանում` առավելագույն արդյունք ունենալու առումով: Այս հարցում առաջին երաշխավորը պետք է լինի պետությունը»,- ասաց Հովսեփյանը: Պատգամավորը նաև հավելեց, որ օրենքով չեն սահմանել, թե ինչ տեսակ բույսեր պետք է աճեցվեն կամ ինչ գյուղատնտեսական աշխատանքներ իրականացվեն, քանի որ սահմանամերձ համայնքները խիստ տարբերվում են կլիմայական բնութագրերով:

Նախագծի վերաբերյալ Կառավարության բացասական դիրքորոշումը ներկայացրեց էկոնոմիկայի փոխնախարար Վարոս Սիմոնյանը, ում խոսքով՝ նախագծի հիմնավորումից հնարավոր չէ լիարժեք գնահատել ներկայացված կարգավորումների արդյունավետությունը, քանի որ բացակայում են ընթացիկ իրավիճակի, խնդիրների, տվյալ բնագա­վառում իրականացվող քաղաքականության, առաջարկվող իրավակար­գա­վորման նպատակի և ակնկալվող արդյունքի համապատասխան վերլու­ծու­թյունները:

Ըստ փոխնախարարի` հստակեցման կարիք ունի պետության կողմից ստանձնված երաշխավորության բնույթը, նաև պարզ չէ, թե պետության կողմից նախագծով նախատեսված ապրանքների գնման ինչ իրավական մեխանիզմներ են գործելու, ինչպես է նշված ապրանքն իրացվելու:

Կառավարության համար խնդրահարույց է պետական գնումների նպատակով գնվող բուսաբուծական արտադրանքների գնման գների սահմանումը, քանի որ փոխնախարարի խոսքով, դրանց իրացման գները ձևավորվում են շուկայական մեխանիզմներով՝ առա­ջարկի և պահանջարկի հիման վրա։

Նախագիծը դրվեց քվեարկության և մերժվեց: