Այսօր «Թումո» կենտրոնի անդամները կենտրոնում կազմակերպված համր ֆիլմերի մարաթոնի շրջանակներում հնարավորություն ստացան դիտելու Չարլի Չապլինի հեղինակած 14 կարճամետրաժ ֆիլմ, քանի որ տարիներ առաջ հենց այս օրն է ծնվել հանրահայտ դերասանն ու ռեժիսորը:

Այնուհետև Հայաստանում Իտալիայի դեսպանատան հետ համագործակցության շնորհիվ «Թումոյում» հյուրընկալվեց իտալական պատվիրակություն: «Թումոյի» անդամներին իր ողջույնի խոսքը հղեց դեսպան Բրունո Սկապինին, որից հետո ցուցադրվեց «L՝Italia del
futuro» ֆիլմը:

Այնուհետև իտալացի երկու ճարտարապետ ներկայացրեց Միլանի պոլիտեխնիկական համալսարանի և Երևանի ճարտարապետության և շինարարության պետական համալսարանի համագործակցությունը մագիստրոսական ծրագրի շրջանակներում:

Միջոցառումն ավարտեց իտալացի կիթառահար Մարկո Մինան՝ ելույթ ունենալով «Թումոյի» անդամների համար:

Ապրիլի 16-ը համարվում է նաև հայ կինոյի ծննդյան օրը, քանի որ 1923 թ. հենց այդ օրն է ընդունվել «Պետական կինոյի կազմակերպման մասին» կառավարական դեկրետը, որով ազգայնացվել են բոլոր մասնավոր կինոթատրոնները:

Մշակութային միջոցառումների շարքն ավարտվեց «Թումոյում» ստեղծված երաժշտական «Գարաժ» խմբի ելույթով, որ նվիրվեց հայ կինոյի հիմնադրմանը: Բենդի պատանիները կատարեցին իրենց հեղինակած 5 ստեղծագործություն՝ կինոռեժիսոր Համո Բեկնազարյանի «Շոր և Շորշոր» կատակերգության թեմայով: Այս մասին հայտնում է «Թումո» կենտրոնի հաղորդակցության բաժինը: