![](/static/articles/13/14/72/l-rz3yji3h3t.jpg)
ԵԱՀԿ Մինսկի խումբը կոչ է անում ազատ արձակել բոլոր ռազմագերիներին և վերատեղակայել զորքերը
ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ) ուրբաթ օրը՝ մայիսի 28-ին, հայտարարություն են տարածել արցախյան հիմնախնդրի կարգավորման և Հայաստանի տարածք ադրբեջանական ուժերի ներխուժման հետևանքով առաջացած սահմանային լարված իրավիճակի վերաբերյալ։ Հայտարարությունը տեղադրվել է ԵԱՀԿ պաշտոնական կայքում։ Հայտարարության մեջ մասնավորապես նշվում է.
«Համանախագահները մայիսի 27-ին և 28-ին Ժնևում խորհրդակցություններ են անցկացրել Կարմիր խաչի միջազգային կոմիտեի նախագահ Պիտեր Մաուրերի և ՄԱԿ-ի փախստականների հարցերով գերագույն հանձնակատար Ֆիլիպինո Գրանդիի հետ: ԵԱՀԿ գործող նախագահի անձնական ներկայացուցիչ Անջեյ Կասպրշիկը ևս մասնակցել է հանդիպումներին: Համանախագահներն ի գիտություն են ընդունել մայիսի 27-ին հայ վեց զինծառայողների գերեվարման վերաբերյալ տեղեկությունը և կոչ արել ազատ արձակել բոլոր ռազմագերիներին ու այլ ձերբակալվածներին՝ «բոլորը բոլորի դիմաց» սկզբունքով: Համանախագահներն ընդգծում են միջազգային մարդասիրական իրավունքին համապատասխան գերիներին վերաբերվելու պարտավորությունը: Նրանք խստորեն հորդորում են կողմերին անհապաղ վերացնել Լեռնային Ղարաբաղ հումանիտար հասանելիության բոլոր սահմանափակումները, ինչպես նաև կոչ անում կողմերին կյանքի կոչել բոլոր հանձնառությունները, որոնք ստանձնել են նոյեմբերի 9-ի հրադադարի հայտարարությամբ:
Համանախագահները նաև իրենց մտահոգություն են հայտնում հայ-ադրբեջանական դեմարկացիայի չենթարկված սահմանին գրանցված միջադեպերի առնչությամբ: Անընդունելի է ուժի կամ ուժի սպառնալիքի կիրառումը՝ սահմանային վեճերը լուծելու հարցում: Կոչ ենք անում երկու կողմերին ձեռնարկել հրատապ քայլեր, այդ թվում վերատեղակայել զինված ուժերը, իրադրության լարվածությունը թուլացնելու և բանակցություններ սկսելու համար, սահմանին խաղաղ ճանապարհով սահմանազատում և սահմանագծում իրականացնելու համար: Համանախագահները պատրաստ են աջակցել գործընթացի իրականացմանը։
Նկատի ունենալով ԵԱՀԿ մանդատի պայմանները և տարածաշրջանի բոլոր ժողովուրդների՝ կայուն, խաղաղ և բարգավաճ ապագայի ձգտումները՝ համանախագահները կրկին կոչ են անում կողմերին ամենավաղ ժամկետներում վերսկսել իրենց հովանու ներքո աշխատանքները»։
Մեկնաբանել