Արտաքին հարեբերությունների մշտական հանձնաժողովի երկու նիստ այսօր չկայացավ, քանի որ ԱԳՆ-ից ներկայացուցյիչներ չկային: Առաջին նիստը հանձնաժողովի նախագահ Ռուբեն Ռուբինյանը հետաձգեց այն պատճառաբանությամբ, որ արտահերթ նիստ է հրավիրված, որպեսզի նիստին զուգահեռ բյուջետային քննարկումներ չընթանան:

Ժամը 13:00-ին նախատեսված էր Ֆինանսավարկային և բյուջետային հարցերի  ու Եվրոպական ինտեգրման հարցերի մշտական հանձնաժողովների համատեղ նիստը, սակայն Ֆինանսավարկային հարցերի հանձնաժողովի նախագահ Արկադի Խաչատրյանը հայտնեց, որ այն հետաձգվում է մինչ 15:00-ն: Այդ ժամին միաժամանակ մի քանի հանձնաժողովների նիստեր կգումարվեն: Խաչատրյանի խոսքով` հետաձգումների պատճառը ԱԳ նախարարի և տեղակալների հրաժարականներն են:

Այս պահին դեռ հայտնի չէ` գումարվող նիստին ԱԳՆ-ից ով է ներկա լինելու:

Մեզ հետ զրույցում, սակայն, ԱԳՆ լրատվության և հանրային դիվանագիտության վարչության պետ Սերոբ Բեջանյանը նշեց, որ բոլոր փոխնախարարները շարունակում են կատարել իրենց պարտականությունները. մի փոխնախարարը գործուղման է, մյուսները` հանդիպումների:

Հիշեցնենք, որ արդեն նախկին նախարար Արա Այվազյանը հրաժարականի դիմում է ներկայացրել մայիսի 31-ին` ասելով, որ իր ղեկավարած կառույցը չի կարող համաձայնություն տալ ինչ-որ նախաձեռնության, որը դեմ է պետական շահին: