Հունիսի 3-ին Բաքվում կայացել են քաղաքական խորհրդակցություններ Ռուսաստանի և Ադրբեջանի արտաքին գործերի նախարարությունների միջև։ Ադրբեջանի ԱԳՆ-ն հայտնում է, որ երկու երկրների պատվիրակությունների քննարկման հիմնական թեման եղել է երկկողմ ռազմավարական գործակցության օրակարգի հարցերը։ Ռուսական պատվիրակությունը գլխավորել է ՌԴ արտաքին գործերի փոխնախարար Անդրեյ Ռուդենկոն, իսկ ադրբեջանական պատվիրակությունը՝ Խալաֆ Խալաֆովը։ 

«Կողմերը կարծիքներ են փոխանակել տարածաշրջանում առկա իրավիճակի և վերջին օրերին ընթացող գործընթացների մասին։ Խորհրդակցությունների ընթացքում կողմերը քննարկել են փոխադարձ հետաքրքրություն ներկայացնող մի շարք հարցեր»,- նշվում է Ադրբեջանի ԱԳՆ տարածած հաղորդագրության մեջ։

Նախօրեին հայտնի էր դարձել, որ Մոսկվայում կայացել էին եռակողմ խորհրդակցություններ Հայաստանի, Ադրբեջանի և Ռուսաստանի ներկայացուցիչների միջև, որի ընթացքում քննարկվել է վերջին շաբաթներին հայ-ադրբեջանական շփման գծում իրավիճակի դեէսկալացիան։

Լուսանկարը՝ ՌԴ ԱԳՆ մամուլի ծառայության