Այսօր «Լուսավոր Հայաստան» կուսակցության նախընտրական ցուցակի առաջին հինգ թեկնածուները «Արմենիա Մարիոթ» հյուրանոցում ասուլիս էին հրավիրել, որպեսզի հանրությանը ներկայացնեին, թե վաղը՝ հունիսի 7-ին, պաշտոնապես մեկնարկող ԱԺ արտահերթ ընտրությունների քարոզարշավն ինչպես են իրականացնելու:

Կուսակցության նախագահ Է. Մարուքյանը նախ ներկայացրեց, թե այսօր ինչ վիճակ է քաղաքական դաշտում և քայլեր չձեռնարկելու դեպքում ինչ պատկեր կստացվի:

«Հստակ կարելի է արձանագրել, որ մինչև ընտրությունները նախընտրական, իշխանության պայքարի վիճակն այնքան է սրվելու, որ գրեթե մենք կարող ենք ակնհայտ ասել, որ քաղաքացիական պատերազմի շեմին ենք լինելու: Սա այլևս որևէ ձևով գաղտնիք չէ: Երեկ հետևում էինք իշխող կուսակցության ծրագրի ներկայացման հավաքին, որտեղ ինչ-որ ջղային մարդիկ քննադատում էին մեր այն գաղափարը, որը վերաբերում է ազգային համաձայնության կառավարություն ձևավորելուն, համերաշխության օրակարգին, միասնական լինելուն, միասնական լինելուն՝ ընդդեմ մեր բոլորի թշնամու»,- հավելեց Էդմոն Մարուքյանը:

Պատգամավորության թեկնածուն զարմացած է, որ համերաշխությունը մերժվում է ոչ միայն իշխող կուսակցության, այլև «մյուս բևեռից»: Իսկ տվյալ պայմաններում համերաշխության այլընտրանքը քաղաքացիական պատերազմն է, բախումները:

Էդմոն Մարուքյանը ներկայացրեց կուսակցության վերլուծության ադյունքները, ըստ որի՝ եթե գործող և նախկին իշխանությունների պայքարը իշխանության համար շարունակվի նույն ոճով, ինչը որ այժմ կա, չենք կարողանա խուսափել բախումներից:

«Ժողովուրդը պետք է մի բան արձանագրի, միշտ իշխանության համար պայքարող բևեռները շատ անվտանգ են, պաշտպանված են, բոլորն ունեն պետական անվտանգություն: Նրանց գլխից մազ չի պակասելու: Ժողովու՛րդ, որպես ընտրողներ, դուք եք լինելու ցանկացած բախման տուժողը»,- նշեց Է. Մարուքյանը, հավելելով, որ այդ ամենի միջով անցել են, տեսել են:

Ըստ պատգամավորության թեկնածուի՝ քաղաքակիրթ քարոզարշավի մերժումը և դուելների առաջարկները, անվանարկումները լավ տեղ չեն տանում:

«Այս պահին, բոլոր հարցումներով ոչ իշխող ուժն է կարողանում հաղթել ընտրությունները, ոչ էլ նախկին իշխանությունները՝ ի դեմս Ռոբերտ Քոչարյանի: Սակայն՝ 40, տարբեր տվյալներով մինչև 45% ընտրող չեն որոշել, թե ում օգտին քվեարկել»,- ասում է Էդմոն Մարուքյանը:

Թեկնածուն նշեց, որ քաղաքական դաշտն այնպես է դասավորվել, որ միակ ուժը, որ թշնամիներ չունի հակամարտող բևեռների մեջ, «Լուսավոր Հայաստան» կուսակցությունն է:

Էդմոն Մարուքյանն առաջարկում է, որ ընտրողներն իրենց ձայները կոնսոլիդացնեն «Լուսավոր Հայաստանի» վրա, ինչի արդյունքում կուսակցությունը կողմերին պարտադրում է ներքաղաքական խաղաղություն: Հակառակ դեպքում կողմերը ոչ մի ռեսուրս չեն խնայելու իրար ոչնչացնելու համար, ինչի հետևանքով ոչնչանալու են բոլորը:

Ընտրապայքարի մեջ մտած ուժերի բևեռները, որոնք արբանյակային ուժեր են, մի մասով սատարում են իշխող կուսակցությանը և կրակի վրա յուղ լցնողներն են, մյուսները հայհոյախառն ելույթներով սպասարկում են նախկին իշխանություններին՝ ի դեմս Ռոբերտ Քոչարյանի:

Էդմոն Մարուքյանը նշեց, որ շուտով կլրանա մեկ ամիսը, ինչ թշնամին հատել է մեր երկրի սահմանը և իր 1000 հոգանոց զորքով տեղակայվել է մեր երկրում, մինչդեռ երկրի ներսում իրար կոկորդ ենք կրծում՝ չգիտակցելով, որ ավելի լուրջ վնասներ ենք կրելու, տուժելու է պետականությունը: Բախումների դեպքում չեն տուժելու ո՛չ Նիկոլ Փաշինյանը, ո՛չ Ռոբերտ Քոչարյանն ու Սերժ Սարգսյանը, բոլորն էլ, Մարուքյանի խոսքերով՝ «լավ տեղավորված են»:

Ասուլիսի ընթացքում է. Մարուքյանը չներկայացրեց կուսակցության ծրագիրը՝ ասելով, որ ընտրողը ծրագրին կարող է ծանոթանալ իրենց բոկլետներից և լրատվամիջոցներից՝ զրույցի շեշտը հիմնականում դնելով ներքաղաքական լարված մթնոլորտը թոթափելու վրա: