Արտահերթ խորհրդարանական ընտրություններին մասնակցող «Պատիվ ունեմ» դաշինքի ցուցակի առաջին համարը զբաղեցնող Արթուր Վանեցյանը Կենտրոնական ընտրական հանձնաժողով է ներկայացրել իր գույքի ու եկամուտների վերաբերյալ հայտարարգիրը:

ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը որպես անշարժ գույք հայտարարագրել է 106 քմ մակերեսով մեկ բնակարան Երևանում, որը գտնվում է Բաղրամյան փողոցում:

Ավտոմեքենա նա չի հայտարարագրել և ոչ էլ՝ 8 մլն դրամը կամ դրան համարժեք արտարժույթը գերազանցող որևէ գույք։

Մեկ տարում՝ 2020 թվականի մայիսից մինչև այս տարվա մայիս, Արթուր Վանեցյանը, ըստ իր հայտարարագրի, 2 մլն 113 հազ. դրամի եկամուտ է ստացել։ Այդ գումարը նա իբրեւ թոշակ է ստացել Ազգային անվտանգության ծառայությունից։

Հայտարարագիրը ներկայացնելու օրվա դրությամբ (04.06.2021թ.) Վանեցյանն ունեցել է 10 մլն ՀՀ դրամ և 25 հազ. ԱՄՆ դոլար դրամական միջոցներ։

Ընկերություններում մասնաբաժիններ, արժեթղթեր և այլ ներդրումներ Արթուր Վանեցյանը չի հայտարարագրել:

Ավելի վաղ «Հետքն»  անդրադարձել է Արթուր Վանեցյանի ընտանիքի անդամների անուններով գրանցված բիզնեսներին:

Հիշեցնենք, որ  «Պատիվ ունեմ» դաշինքի թեկնածուները 230-ն են: