Այսօր՝ հունիսի 7-ին, Ազգային ժողովրդավարական բևեռը սկսեց իր քարոզարշավը։ 

ԶԼՄ-ների և աջակիցների հետ հանդիպման ժամանակ ելույթ ունեցան Գարեգին Չուգասզյանը, կուսակցության թեկնածուների ցուցակը գլխավորող բժիշկ Վահե Գասպարյանը, շարժման անդամ Վահրամ Մարտիրոսյանը և Ժիրայր Սեֆիլյանը։ 

Հայաստանում քաղաքական ճգնաժամը հաղթահարելու ճանապարհային քարտեզը ներկայացրեց Գարեգին Չուգասզյանը։ 

«Բոլորի համար ակնհայտ է, որ մեր պետականությունը և մեր ինքնությունը ճգնաժամի մեջ է, և հարց է առաջանում` մեր պետականությունը և ինքնությունը ապագա ունե՞ն»։ Չուգասզյանի խոսքով՝ կուսակցությունը հավատում է ժողովրդի ապագային, բայց այն տեսնում է այլ կերպ։

Թումանյանի «Չարի վերջը» հեքիաթը մեջբերելով` Չուգասզյանը պնդեց, որ Բևեռը ոչ թե նմանվում է կկվին, որն իր ձագերին գցում է հերթական գիշատիչ աղվեսի սպառնալիքներին, այլ իմաստուն ագռավին, որը բերում է չարի վերջը։ «Չարի վերջը բերող ագռավի պատմությունը ինչպե՞ս հասկանալ այսօր։ Ես կարծում եմ՝ դա մեզ ուղղված՝ Արևմուտքի ձեռքը բռնելու մեջ է»։

Չուգասզյանի պնդմամբ՝ այսօր տարածաշրջանում ձևավորվում է նոր անվտանգային և տնտեսական ճարտարապետություն։ Հայաստանը պետք է գիտակցի իր շահը և Հնդկական օվկիանոսից Սև ծով ձգվող նոր տրանսպորտային և ենթակառուցվածքային միջանցքի վրա գրավի իր տեղը։ Սա հնարավորություն կտա Հայաստանին ստանալ անվտանգություն, բազմամիլիոնանոց ներդրումներ և արդյունաբերական հեղափոխության համար տեխնոլոգիաներ։ 

Բևեռն ամիսներ առաջ հայտարարել է քաղաքական Սարդարապատ, որն ազգային ազատագրական շարժում է։ Այս շարժումը նպատակ ունի կոտրելու Հայաստանում 33 տարի գոյություն ունեցող գաղութային քրեաօլիգարխիկ համակարգը և ամրապնդելու Հայաստանի ինքնիշխանությունը։ 

«33 տարի շարունակ մենք փոխում էինք անձանց, ղեկավարներին, բայց թողնում էինք համակարգը՝ այն համակարգը, որը ծառայում էր Կրեմլին, երկրի թալանին՝ տնտեսության թալանին, բանակի թալանին, և այսօր կանգնած ենք խորը ճգնաժամի առջև»,-իր ելույթում նշեց Վահե Գասպարյանը։ 

Ժամանակավոր կառավարություն ձևավորելուց հետո Բևեռը խոսք է տալիս իրավաքաղաքական գնահատական տալ նախկին բոլոր ռեժիմներին, իրականացնել անցումային արդարադատություն, որը ենթադրում է նաև լյուստրացիա, նոր Սահմանադրության ընդունում, նոր Ընտրական օրենսգրքի և «Կուսակցությունների մասին» օրենքի ընդունում։ Այս ամենն իրականացնելուց հետո Բևեռը տեսնում է նոր խորհրդարանական ընտրությունների անցկացում։ 

Արցախի հարցում Բևեռի դիրքորոշումը անփոփոխ է՝ Արցախի միացում Հայաստանի Հանրապետությանը։ 

Վահրամ Մարտիրոսյանի խոսքով՝ Բևեռի տնտեսական ծրագիրը «կարելի է կոչել նոր Հայաստանի նոր շունչը»։

Բևեռի պնդմամբ, տնտեսության զարգացման հարցում վերջին 33 տարվա ընթացքում եղել են երկու հիմնական հայեցակարգային մոտեցումներ։ Առաջին՝ «յոլա գնալ մինչև վերջ, կառուցել խրճիթներ և յոլա գնալ» և երկրորդ՝ «ամեն ինչին մոտենալ հատվածային՝ հատվածային զարգացնել տնտեսությունը, ռազմարդյունաբերությունը, գիտությունը, կրթությունը, առողջապահությունը» և այլն։ 

Բևեռը տնտեսությանը վերաբերվելու է ինչպես ճարտարապետությանը՝ առանց ճարտարապետության հնարավոր է կառուցել խրճիթ, միգուցե բնակարան, բայց ոչ` կառավարել տնտեսական համակարգը։

Վահե Մարտիրոսյանի պնդմամբ, Բևեռի տնտեսական ծրագիրը բերում է այդ ճարտարապետությունը՝ բոլոր ոլորտներում ինտեգրված լուծումներ։ 

Բևեռի առաջարկած տնտեսական լուծումներին և այլ դրույթներին մանրամասն կարող եք ծանոթանալ կուսակցության հրապարակած ընտրական ծրագրում՝ այստեղ։ 

Ելույթներից հետո կուսակցությունը սկսեց դրամահավաքը։ 

Լուսանկարը՝ Բևեռի ֆեյսբուքյան էջից։