Մենք ձեզնից ստացած իշխանությունը վերադարձրել ենք ձեզ:

Այս մասին Արագածոտնի մարզի Արագածավան համայնքում ասաց վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը:

«Էս ընթացքում ձեզ հայտնի ուժերն ուզում էին խլել ձեր իշխանությունը, բայց մենք այն ամեն գնով պահել ենք, պահել ենք ոչ թե մեզ համար, այլ ձեզ համար, որ այսօր վերադարձնենք ձեր իշխանությունը: Հունիսի քսանին առաջին հերթին պետք է լուծեք ներքաղաքական ճգնաժամի հարցը, դրա համար հարկավոր է, որ առնվազն 60% քվեարկեք ՔՊ-ի օգտին»,-ասաց նա:

Ըստ Փաշինյանի` հաջորդ խնդիրը տարածքային ամբողջականության և երկրի սահմանների պաշտպանունակության բարձրացման հարցն է: Նա հիշեցրեց, որ լուծումն այն է, որ ադրբեջանական զորքերը դուրս գան ՀՀ սահմաններից, որից հետո հայելային եղանակով թե հայկական, թե ադրբեջանական զորքերը հեռանան Սոթք-Խոզնավար հատվածից և այնտեղ տեղակայվեն ռուս սահմանապահներ կամ ԵԱՀԿ Մինսկի խմբի այլ անդամ որևէ երկրի դիտորդներ:

Վարչապետի պաշտոնակատարը պնդեց` սկսած 1996 թվականից մինչ 2018-ը գոյություն ունեցող ԼՂ բանակցային գործընթացը միայն մի հնարավորություն Էր թողել` Ղարաբաղը փուլային տարբերակով Ադրբեջանին տալ: Փաշինյանն ասաց. «Այս իրավիճակում ավելի շատ հնարավարություն կա Արցախի հարցը հանրության պատկերացումներին համապատասխան լուծելու, քան չորս տարի առաջ էր», ապա հիշեցրեց, որ ԵԱՀԿ Մինսկի խմբի համանախագահության շրջանակում արձանագրվել է Արցախի վերջնական կարգավիճակը ճշգրտելու համար բանակցային գործընթացի վերականգման անհրաժեշտությունը:

«Եւ մենք պատկերացնում ենք, որ այս բոլոր իրադարձություններից հետո «անջատում` հանուն փրկության» բանաձևի իրագործման հնարավորությունն էականորեն մեծացել է»,- ասաց նա:

Փաշինյանը կենսական նշանակության խնդիր որակեց գերիների անհապաղաղ վերադարձի հարցը:

«2018-ին ես էի ձեզ դուխ տալիս, 2021-ին դուք եք ինձ դուխ տալիս»,- ասաց նա` դիմելով քարոզարշավին ներկա քաղաքացիներին:

Փաշինյանի համոզմամբ` հունիսի 20-ի արտահերթ խորհրդարանական ընտրություններն առաջին հերթին նրա համար են, որ ժողովուրդը որևէ հաղթանակի զգացողություն ինքն իր մեջ վերագտնի:

«Մենք ասում ենք` արդյունքը պետք է լինի հետևյալը, որ իրավատեր քաղաքացին հունիսի 21-ին նախնական արդյունքներին ծանոթանալով, ինքն իրեն ասի` ես այս ընտրություններում հաղթեցի: Մեր նպատակը ոչ թե մեր անձերի հաղթանակն է, այլ ժողովրդի հաղթանակը»,- ասաց նա:

Ըստ Փաշինյանի` եթե ժողովուրդը դեմ է կոռումպացված իշխանությանը, ապա չի կարող կոռումպացված նկատառումներով ընտրություն կատարել, եթե դեմ է անարդար ընտրությանը, չի կարող ընտրություններին գնալ անարդարության նկրտումով, եթե պարտությանը դեմ է, չի կարող ինքն իրեն դատապարտել պարտության:

«Այս ընտրություններն անում ենք, որ ի վիճակի լինենք նոր էներգիա կուտակել և ծառայեցնել երկրի բարօրությանը»,- ասաց Նիկոլ Փաշինյանը:

Հիշեցնենք, որ Փաշինյանը քարոզարշավը սկսել է հունիսի 7-ին, Արմավիրի մարզից, այսօր ամբողջ օրը նա լինելու է Արագածոտնի մարզում: