Վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը Տավուշի մարզի Աչաջուր համայնքում անդրադարձավ իր ու զինված ուժերի նախկին գլխավոր շտաբի պետ Օնիկ Գասպարյանի միջև եղած կոնֆլիկտին:

Փաշինյանը հիշեցրեց, որ մինչ իր` վարչապետի պաշտոնում ընտրվելը Օնիկ Գասպարյանը զբաղեցնում էր ԶՈՒ գլխավոր շտաբի պետի տեղակալի պաշտոնը, և նրան այդ պաշտոնում նշանակելիս Փաշինյանն ասել է իր մտահոգության մասին, որ նախկին իշխանությունների հետ ամուր կապեր ունի: Ըստ Փաշինյանի` Օնիկ Գասպարյանը վստահեցրել է` այդ հարցում անհանգստանալու որևէ առիթ չունի:

«Ես Օնիկին վստահել եմ հարազատ եղբոր նման, իր ասածները երբեք կասկածի տակ չեմ առել: Երբ ինքը նշանակված էր հուլիսյան պատերազմի ժամանակ ԱԱԾ-ն ինձ մի դրվագի մասին ասեց, որ սենց դրվագ է եղել, ինքը սխալ է զեկուցել, ես ասացի` բացառված է, չեմ հավատում, որ սխալ բան զեկուցած լինի… Էդպես եղել է մինչև պատերազմի ավարտվելը»,-ասաց Փաշինյանը:

Ըստ նրա` նույնիսկ պատերազմի ընթացքում Արցախից իր թիմակիցները ինչ-որ տեղեկություններ են հայտնել, սակայն նա կասկածի տակ է առել այդ տեղեկությունները և հավատացել Գասպարյանին:

Փաշինյանի ներկայացմամբ, նոյեմբերի 20-ին շտաբի նախկին պետ Օնիկ Գասպարյանը գնացել է Սյունիքի մարզ, հանդիպել «որոշ շրջանակների» հետ և հեռախոսազրույց ունեցել Սերժ Սարգսյանի, որի ընթացքում «ամենավերջին բառերն են ասել» Փաշինյանի մասին և պայմանավորվել հանդիպել: Այդ երեկո Գասպարյանը զանգահարել է Փաշինյանին ու հանդիպում խնդրել:

«Ինքը կարճ ասած ասում է` որոշու'մ կայացրու, հրաժարական տուր, ասում եմ` Օնիկ ջան, քանի օր չես քնել, ասում է` երևի 4-5 օր, ասում եմ` գնա, քնի, հանգստացիր, արի այս խոսակցությունը մոռանանք: Հետո կանչում եմ իրեն ու ասում` Օնիկ, ես քեզ անվերապահորեն վստահել եմ, ուզում եմ էլի վստահել՝ հաշվի առնելով տարբեր հանգամանքներ, այդ թվում՝ էն, որ իրար գիտենք արմատներից: Ես քեզ խոստանում եմ` կմոռանամ այդ պատմությունը, որ ասել ես հրաժարական տուր»,-պատմեց Փաշինյանը: Ըստ նրա` այնուհետև ի հայտ են եկել դրվագներ, որոնք ապացուցել են, որ շատ մանրամասներ իրեն ճիշտ չեն զեկուցվել, ինչի հետևանքով ի հայտ են եկել խնդիրներ: Նրա վստահեցմամբ` աստիճանաբար իր համար ակնհայտ է դարձել, որ գլխավոր շտաբը համալրում է ընդդիմության շարքերը:

Փաշինյանը նաև հավելեց` Օնիկ Գասպարյանին այն աստիճան է անվերապահորեն վստահել, որ երբ վերջինս պատերազմի ընթացքում ասել է, որ շտաբի պետի տեղակալ Տիրան Խաչատրյանը միջոցներ է ձեռնարկում, որ հակագրոհ կազմակերպի, պետք է քաջալերել, ազգային հերոսի կոչում շնորհել, չի էլ քննարկել, միանգամից համաձայնել է:

«Էսօր Տիրան Խաչատրյանն իմ հասցեին ամենավերջին խոսքերն է ասում: Տիրան Խաչատրյանը թող իր կոչումից հրաժարվի, որովհետև եթե արժանապատիվ սպա է ու համարում է, որ էն մարդը, որն իրեն հերոսի կոչման միջնորդություն է ստորագրել, ոչ մի բան չի հասկանում, ուրեմն պետք. է հրաժարավի այդ կոչումից: Մենք բոլորս կհավատանք իր անկեղծությանը, որ պետական մտածումներ ունի»,-ասաց նա:

Փաշինյանը նաև անդրադարձավ այն լուրերին, թե նոյեմբերի 9-ի հայտարարությունը ստորագրելիս հակված է եղել նախնական տարբերակը ստորագրել, որտեղ եղել է նաև տավուշյան սահամանամերձ գյուղերի մասին դրույթ, և Գասպարյանը կանխել է: Փաշինյանը վստահեցրեց` իրականությունը ճիշտ հակառակն է, և այդ քննարկմանը եղել է մեկ տասնյակ անձ, ովքեր կարող են դա հաստատել: Հետադարձ հայացք գցելով՝ Փաշինյանն այն տեսակետին է հանգել, որ Օնիկ Գասպարյանը մտածել է՝ որքան վատը լինի այդ թուղթը, այդքան մեծ հավանականություն կա, որ քաղաքական պայթյուն կառաջանա: Փաշինյանը վստահեցրեց` իր և Օնիկ Գասպարյանի հարաբերություններում որևէ անազնիվ քայլ չի արել: