Վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը Գեղարքունիքի մարզի Սևան քաղաքում քարոզարշավի ժամանակ քննադատական խոսքեր հնչեցրեց Հայ առաքելական եկեղեցու ղեկավար կազմի հասցեին:

«Վերջին տարիներին հոգևոր էլիտայի ներկայացուցիչները, խոսքը ղեկավար կազմի մասին է, ամեն ինչ արել են Հայաստանի կառավարությանը սեփական կամքը պարտադրելու, Հայաստանում տեղի ունեցած հեղափոխության ձախողմանը հասնելու համար: Մեզ էսօր ասում են, թե մենք փորձում ենք վարկաբեկել Հայ առաքելական եկեղեցու ավանդական արժեքները: Ո´չ, այդ արժեքները վարկաբեկում  են կոռումպացված հոգևորականները»,-պնդեց նա:

Նիկոլ Փաշինյանի խոսքով` եկեղեցում կան բազմաթիվ պարկեշտ ու նվիրյալ հոգևորականներ, սակայն, ըստ նրա, խայատառակություն է այն, որ Հայ առաքելական եկեղեցու Արարատյան թեմի առաջնորդի մասնակցությամբ ձայնգրություն է հրապարակվում, որն ամբողջությամբ դեմ է քրիստոնեական արժեքներին (նկատի ունի Նավասարդ արքեպիսկոպոս Կճոյանին. հեղ.):

«Ո՞վ է ավելի շատ վարկաբեկում, կոռուպցիայի մեջ ներգրավված հոգևորականները, թե՞ էն մարդիկ, ովքեր ուզում են, որ եկեղեցին իրենց քննադատությամբ լինի մեր հոգիների, մեր սրտերի ու մեր մտքերի առաջնորդը»,-ասաց Փաշինյանը:

Վարչապետի պաշտոնակատարը պնդեց` նման հոգևորականներին չի պատասխանելու, իր պատասխանը աստվածշնչյան է, ինչից հետո նա կարդաց 55-րդ սաղմոսը:

Հիշեցնենք, որ այսօր քարոզարշավի վեցերորդ օրն է, Փաշինյանը քարոզարշավը սկսել էր հունիսի 7-ին Արմավիրի մարզից, հունիսի 8-ին Արագածոտնի մարզում էր, հունիսի 9-ին` Շիրակի մարզում, հունիսի 10-ին` Լոռու մարզում, երեկ` Տավուշում, այսօր ամբողջ օրը կլինի Գեղարքունիքում, երեկոյան հանրահավաք է սպասվում Գավառում: