Ուսուցիչների ատեստավորման նպատակով 182 մլն դրամ կհատկացվի
Կառավարությունը 182 մլն դրամ կուղղի հանրակրթական հիմնական ծրագրեր իրականացնող ուսումնական հաստատությունների` հերթական ատեստավորման ենթակա ուսուցչի վերապատրաստման նպատակով։ Նախատեսված գումարը կնվազեցվի 2021 թվականի պետբյուջեի «Կրթության որակի ապահովում» ծրագրի «Ատեստավորման նոր համակարգի ներդրում՝ ուղղված ուսուցիչների որակի բարձրացմանը» և «Կրթության բովանդակային և մեթոդական սպասարկում» միջոցառումներից։ Որոշումն ընդունվեց գործադիրի հունիսի 17-ի նիստում։
Ըստ որոշման հիմնավորման՝ «Կրթության ազգային ինստիտուտ» ՓԲԸ-ի լուծարման հետևանքով նախորդ երկու տարիներին հանրակրթական ուսումնական հաստատություններում չի իրականացվել ուսուցիչների ատեստավորում: Ուսուցիչները հնարավորություն չեն ունեցել տարակարգ ստանալու, իսկ «Հանրակրթության մասին» օրենքի համաձայն՝ յուրաքանչյուր տարի ոսուցիչների առնվազն մեկ հինգերորդը ենթակա է ատեստավորման:
«Ակնկալվում է, որ առաջիկա երկու տարիներին կատեստավորվեն ոչ միայն այդ տարեթվերին ատեստավորման ենթակա ուսուցիչները՝ շուրջ 7400 ուսուցիչ, այլև նախընթաց երկու տարիներից գործընթացին չմասնակցած ուսուցիչները, ինչը զգալի մեծացնում է ատեստավորվողների թիվը՝ յուրաքանչյուր տարի կրկնապատկելով»,- նշեց ԿԳՄՍ նախարարի պաշտոնակատար Վահրամ Դումանյանը։
Տիգրան Ավինյանը խնդրեց վերջինիս ներկայացնել, թե ինչպես է ատեստավորման դեպքում փոփոխվում ուսուցիչների աշխատավարձի դրույքաչափը։
Վահրամ Դումանյանը հայտնեց, որ նախագիծը վերաբերում է օրենքի պահանջով ատեստավորմանը, իսկ աշխատավարձի դրույքաչափը 30-50 տոկոսով վերանայվում է կամավոր ատեստավորման դեպքում, որի ժամանակ ատեստավորման չափանիշներն ավելի բարձր են լինելու։
Մեկնաբանություններ (1)
Մեկնաբանել