Ընտրողը պահանջում էր 26-րդ քվեաթերթիկը
Մալաթիա-Սեբաստիա վարչական շրջանի թիվ 7/45 ընտրատեղամասում ընտրողներից մեկը պահանջում էր իրեն տրամադրել 26-րդ քվեաթերթիկը: Հանձնաժողովի անդամները նրան բացատրեցին, որ ընտրությանը մասնակցում է 25 քաղաքական ուժ, 1-ը ինքնաբացարկ է ներկայացրել: Քաղաքացին քվեարկեց միայն բոլոր քվեաթերթիկները ստուգելուց հետո:
Մի քանի տարեց ընտրող էլ քվեախցից դուրս էին փորձում քվեաթերթիկը դնել ծրարի մեջ, սակայն հանձնաժողովի նախագահը թույլ չտվեց:
Ընտրատեղամասում գրանցված ընտրողները 1889-ն են: Ժամը 11:00-ի դրությամբ քվեարկությանը մասնակցել է 327 ընտրող:
Հանձնաժողովի նախագահ Նարինե Ենգիբարյանը նշեց, որ ընտրողներն ակտիվ են, և հավանաբար առավոտյան են գալիս ընտրության՝ շոգից խուսափելու նպատակով:
Ընտրատեղամասում հանգիստ է, միջադեպեր չեն գրանցվել: Ընտրողներին օգնելու համար գրանցվել է 2 հոգի:
Այստեղ վստահված անձինք երկուսն են՝ «Քաղաքացիական պայմանագիր» կուսակցությունից և «Հայաստան» դաշինքից, դիտորդներ չկան:
Մեկնաբանել