Այսօր Երևանում հանրությանը ներկայացվեց ԵԱՀԿ աջակցությամբ հրատարակված ուղեցույցը, որում ամփոփ ներկայացվում են Հայաստանում մայիսի 6–ին կայանալիք խորհրդարանական ընտրություններին մասնակցող կուսակցությունների  ծրագրերը, գործունեությունն ու նպատակները:

Ուղեցույցը պատրաստվել է «Քաղաքացիական և սոցիալական զարգացման հիմնադրամ» հասարարական կազմակերպության կողմից` ԵԱՀԿ երևանյան գրասենյակի և «Քաունթերփարթ Ինթերնեշնլի» հայաստանյան ներկայացուցչության կողմից իրականացվող ԱՄՆ ՄԶԳ «Քաղաքացիական հասարակության և տեղական ինքնակառավարման աջակցության» ծրագրի աջակցությամբ:

«Այս ձեռնարկը Հայաստանում ընտրողներին աջակցելու օգտակար գործիք է իրազեկված որոշում կայացնելու համար և կնպաստի մասնակցային ընտրական գործընթացին»,- ասաց ԵԱՀԿ երևանյան գրասենյակի ղեկավարի տեղակալ Քարել Հոֆսթրան:

Միջոցառմանը մասնակցեցին քաղաքական կուսակցությունների, պետական ​​մարմինների, քաղաքացիական հասարակության, միջազգային կազմակերպությունների և լրատվամիջոցների ներկայացուցիչներ:

«Քաղաքացիական և սոցիալական զարգացման հիմնադրամ»-ի նախագահ Սամվել Մխիթարյանը հավելեց. «Ընտրություններին մասնակցող կուսակցությունների քաղաքական պլատֆորմների, ծրագրերի ու նպատակների մասին անաչառ և համակողմանի տեղեկատվության տրամադրումը կարևոր է: Այն օգնում է բարձրացնել քաղաքացիների իրազեկությունը և քաղաքական ակտիվությունը, ինչպես նաև հնարավորություն է կուսակցությունների համար` լինել հավասարապես ներկայացված հանրությանը»:

Այժմ միայն հայերեն հրատարակությունն ունի շրջանառություն վեց հազար տպաքանակով և կտարածվի քաղաքական կուսակցությունների, տեղական դիտորդություն իրականացնող ՀԿ-ների, լրատվամիջոցների ներկայացուցիչների և հանրության լայն շրջանակներում: Շուտով լույս կտեսնի անգլերեն էլեկտրոնային տարբերակը:

Նման ուղեցույց նաև հրատարակվել էր Հայաստանի 2007 թվականի խորհրդարանական ընտրությունների նախաշեմին և դրական գնահատվել ընտրական գործընթացների շահառուների կողմից:

Ուղեցույցի էլեկտրոնային տարբերակը հայերեն լեզվով կարող եք գտնել` այստեղ http://www.osce.org/yerevan և www.fcsd.am. 

ԵԱՀԿ երևանյան գրասենյակ