Գործարար Իլոն Մասկին պատկանող SpaceX ընկերությունը հայտարարել է, որ 2021 թվականի սեպտեմբերից Starlink արբանյակային ինտերնետ նախագիծը ողջ աշխարհում կապահովի շարունակական անխափան ծածկույթ։ Այդ մասին հայտնում է Reuters գործակալությունը՝ հղում անելով SpaceX-ի նախագահ և գլխավոր օպերացիոն տնօրեն Գվին Շոթվելին։

«Մենք հաջողությամբ տեղակայել ենք մոտ 1800 արբանյակ, և հենց նրանք դուրս գան աշխատանքային ուղեծիր, մենք կունենանք անխափան գլոբալ ծածկույթ։ Դա հավանաբար տեղի կունենա սեպտեմբերին»,- նշել է Շոթվելը՝ Macquarie Group-ի տեխնոլոգիական կոնֆերանսին։

SpaceX-ի նախագահի խոսքերով՝ ընկերությունն այնուհետ կսկսի կարգավորող մարմինների հետ աշխատանքը, «որպեսզի մտնեն բոլոր երկրներ և պայմանավորվեն հեռահաղորդակցության ծառայությունների մատուցման շուրջ»։

Այս տարվա մայիսին SpaceX-ի հիմնադիր Իլոն Մասկը հայտարարել էր, որ Starlink-ը ստացել է ավելի քան 500 000 նախնական պատվեր ինտերնետ ծառայությունների համար։

2020 թվականի հոկտեմբերին ընկերությունը սկսել էր Starlink-ի beta թեստավորումը, որին, Գվին Շոթվելի խոսքերով, մասնակցում էին 11 երկրի օգտատերեր։ Ծառայության ամսական վճարը կկազմի 99 դոլար։

Լուսանկարը՝ Starlink-ի պաշտոնական կայք էջից