HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Էդմոն Մարուքյան. «Ընտրությունները վերածվեցին վստահության հանրաքվեի՝ նախկինների վերադարձը բացառելու նպատակով»

«Լուսավոր Հայաստան» կուսակցության նախագահ Էդմոն Մարուքյանն այսօր կուսակցության կառավարման խորհրդի մի շարք անդամների մասնակցությամբ մամուլի ասուլիս էր հրավիրել: Թեման՝ հունիսի 20-ին կայացած խորհրդարանական արտահերթ ընտրություններն էին ու դրանից հետո ձևավորված քաղաքական նոր իրադրությունը:

Էդմոն Մարուքյանն ասաց, որ «Լուսավոր Հայաստան» կուսակցությունն ընդունելով ընտրությունների արդյունքները իրենց գործունեությունն իրականացնելու են խորհրդարանից դուրս: Մարուքյանը նշեց, որ օգտագործելու են իրենց բոլոր կապերը՝ ի նպաստ երկրի շահերի:

Էդմոն Մարուքյանն ասաց, որ չի կարծում, թե նոր խորհրդարանը կարճ կյանք է ունենալու: Բացի այդ, խորհրդարան անցած ուժերը ձեռնտու են իշխանություններին, քանի որ վերջիններիս քննադատելու ժամանակ, ամեն անգամ հիշեցնելու են, թե իրենց պաշտոնավարման տարիներին ինչեր են կատարվել երկրում:

Էդմոն Մարուքյանի խոսքերով՝ իրենք համոզված են եղել խորհրդարան անցնելու առումով: Իրավիճակը փոխվել է վերջին երկու օրերի ընթացքում: Ռոբերտ Քոչարյանի գլխավորած «Հայաստան» դաշինքի եզրափակիչ հանրահավաքը Հանրապետության հրապարակում քաղաքացիները տեսել են, մտածել են, որ նախկին իշխանությունները հետ են վերադառնալու, դրա համար վերջին պահին փոխել են իրենց որոշումը և քվեն տվել են իշխանությանը, որպեսզի նախկինները չվերադառնան: Այդ մասին ասել են նաև քաղաքացիները՝ այցելելով «Լուսավոր Հայաստան» կուսակցության տարածքային գրասենյակներ:

Մարուքյանի կարծիքով՝ մարդիկ գնացել և վերահաստատել են հեղափոխությունը: Ըստ նրա՝ նախկին իշխանությունը հեղափոխությունը փորձեց կապել պատերազմի հետ, մինչդեռ այդ կապը չկա, ինչը ապացուցվեց նաև քվեարկությամբ:

Էդմոն Մարուքյանը նշեց, որ նախկինում էլ է ասել՝ Նիկոլ Փաշինյանի իշխանության վերարտադրմանն ակտիվ քաղաքականություն մտնելով՝ օգնել են Սերժ Սարգսյանն ու Ռոբերտ Քոչարյանը: Արդյունքում ընտրությունները վերածվեցին վստահության հանրաքվեի և մարդիկ ընտրեցին գործող իշխանություններին՝ նախկիննրի վերադարձը բացառելու նպատակով:

«Լուսավոր Հայաստան»-ի նախագահն ասաց, որ ընտրատեղամասերում քվեաթերթիկների վերահաշվարկներին հետևում են և մեծ հաշվով էական տատանումներ չեն արձանագրվել, որոնք կազդեն ընտրությունների արդյունքների վրա: Մարուքյանը կարծում է՝ բոլոր այն տեղամասերում, որտեղ խախտումներ են եղել, պետք է այդ տեղամասերի արդյունքներն անվավեր ճանաչվեն:

Մարուքյանը նշեց, որ կան քաղաքական ուժեր, ովքեր արդյունքները վիճարկելու համար Սահմանադրական դատարան են դիմելու, սակայն դրան զուգահեռ, կարծես թե, վերցնելու են մանդատները՝ դրանով իսկ ընդունելով ընտրությունների արդյունքները:

«Հայաստանում հաղթել է մուրճը և մանգաղը, համերաշխության օրակարգը պարտվել է»,- ասում է Էդմոն Մարուքյանը՝ հավելելով, որ չի կարծում, թե նոր խորհրդարանը կլինի որակապես ավելի լավը, քան նախորդն էր:

Անդրադառնալով ընտրություններից հետո վարչապետ Նիկոլ Փաշինյանի հետ հանդիպմանը, Էդմոն Մարուքյանն ասաց, որ նման նախաձեռնությամբ հանդես է եկել հենց Փաշինյանը: Նրա խոսքերով՝ «Լուսավոր Հայաստանը» երբեք չի մերժել հանդիպումները, այդ թվում՝ իշխանությունների հետ:

Էդմոն Մարուքյանն ասաց, որ վաչապետը ցանկություն է հայտնել ստեղծել ֆորմատ՝ արտախորհրդարանական ուժերի հետ շփվելու, նրանց ձայնը լսելի դարձնելու համար, ինքն էլ պատասխանել է, որ երբ ստեղծվի՝ կքննարկեն:

Մարուքյանը նշեց, որ որևէ քննարկում չի եղել իրեն պաշտոն տալու մասին: Բացի այդ, ինքն էլ չի ակնկալում որևէ պաշտոն ստանալ, քանի որ իրեն չի պատկերացնում խորհրդարանից դուրս:

Էդմոն Մարուքյանն ասաց, որ աշխատանք չի փնտրում: Կուսակցությունը շատ գործ ունի անելու, այդ թվում՝ անելիքները վերաիմաստավորելու առումով: Կուսակցության նախագահը նշեց, որ մինչ այդ մի փոքր կհանգստանան, քանի որ վերջին տարիներին բուռն գործունեություն են ծավալել ու «տան երես» չեն տեսել: Աշնանը սպասվում է ՏԻՄ ընտրություններ և որտեղ ուժեղ լինեն, այդտեղ էլ մասնակցություն կունենան:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter