Նախկին վարչապետ Հրանտ Բագրատյանը ՀԱԿ-ի նախընտրական քարոզչության շրջանակներում այսօր Էջմիածնում ընտրողներին փաստերով ներկայացնում էր, թե ինչու մայիսի 6-ին չպետք է ընտրել իշխանության ներկայացուցիչներին եւ ինչու պետք է ձայն տալ ՀԱԿ-ին:

Հրանտ Բագրատյանի խոսքով, երկրում ապրանքների ներկրման գծով մենաշնորհ է, ինչի հետեւանքով էլ գները չեն իջնում, քանի որ մրցակցություն չկա: «Միայն շաքար բերողի (շաքարավազի ներկրման մենաշնորհը պատգամավոր Սամվել Ալեքսանյանինն է,-հեղ.) չտված հարկերը հերիք է թոշակները եռապատկելու համար: Տղեն տարեկան չի տալիս 110 մլրդ դրամ, 10 մլրդ թուլափայ գցում է բյուջեն, մենք ուրախանում ենք: Մենք այս օլիգարխիկ տնտեսությունը քանդելու ենք»,-ասաց Հրանտ Բագրատյանը:

Ըստ նրան` օլիգարխիկ տնտեսությունը բացառապես ստեղծվել է երկրորդ նախագահ Ռոբերտ Քոչարյանի օրոք: Նա մի քանի թաղային հեղինակություններից սարքել է օլիգարխիկ համակարգը:

«Դուք կարո՞ղ եք մի օլիգարխի անուն ասել, որ մեր ժամանակ է եղել: Կարո՞ղ եք ասել մեկին, որ համ տնտեսական ուժ ենք տվել, համ պաշտոն ենք տվել»,-ավելացրեց Հ. Բագրատյանը: Նրա պնդմամբ,  օլիգարխիկ համակարգը ստեղծել է էությամբ «գեղցի» մի մարդ, ով դեռ շարունակում է մնալ «գեղցի»:

«Եթե մենք հիմա չփոխենք, այս երկիրը թուրքին է հասնելու, ժողովուրդը թողնում գնում է, 47.000 մարդ 2010թ.-ին, 59.000՝ 2011թ-ին եւ 30.000՝ 2012թ.-ի առաջին եռամսյակին, այսպես ո՞ւր ենք հասնելու»,-հավելեց նախկին վարչապետը:

Ինչ վերաբերում է 29.000 դրամ միջին կենսաթոշակին, ապա, Հրանտ Բագրատյանի ասելով, այդ գումարի չափը պետք է կրկնապատկվեր: Ներկայացնելով ՀԱԿ-ի նախընտրական ծրագիրը` Հ. Բգրատյանն ասաց, որ իրենք նախատեսում են միջին կենսաթոշակը սահմանել 99.000 դրամ: «13 մլրդ դոլար չմուծված հարկ կա: Հիմա իմ հետեւից հազար ու մի բան կարող են ասել, բայց ո՞ր մի օբյեկտիս, ո՞ր մի գողացածիս եք ծանոթ, Տեր-Պետրոսյանի ո՞ր մի գողացածին եք ծանոթ, ո՞ր մի բիզնեսն է իրանը»,-ավելացրեց Հրանը Բագրատյանը: