Խորհրդարանն արտահերթ նիստում երկրորդ ընթերցմամբ քննարկեց ԱԺ պատգամավորներ Նիկոլայ Բաղդասարյանի, Ծովինար Վարդանյանի, Վիկտոր Ենգիբարյանի, Հայկ Գևորգյանի, Սերգեյ Մովսիսյանի, Գևորգ Պապոյանի, Հայկ Սարգսյանի, Հովիկ Աղազարյանի, Հռիփսիմե Գրիգորյանի, Սերգեյ Ատոմյանի և Հայկ Ցիրունյանի հեղինակած «Քաղաքացիական օրենսգրքում փոփոխություն կատարելու օրենքի նախագիծը», որով  առաջարկում է կանոնակարգել ապօրինի շինությունների հարցը: Ըստ նախագծի` նման նախագծի առկայության դեպքում Հայաստանում այլևս չեն կառուցվի ինքնակամ կառույցներ:

Նախագծի հիմնավորման համաձայն` նախորդ տարիներին ձևավորվել է պրակտիկա, երբ տնտեսվարող սուբյեկտներն ու ֆիզիկական անձինք կառուցապատումը կատարում էին առանց շինարարության  թույլտվության, ապա դիմում համայնքի ղեկավարին` ինքնակամ կառույցներն օրինականացնելու խնդրանքով: Ըստ հեղինակների` ինքնակամ շինությունների օրինականացումն ավելի արագ և ավելի մատչելի է, քան օրինական կարգով շինարարության թույլտվություն ստանալը:

Ըստ Բաղդասարյանի` նախագծի ընդունումից հետո պետական կամ համայնքային պատկանելության  հողամասի վրա ինքնակամ կառուցված որևէ կառույց օրինականացման ենթակա չի լինելու և ապամոնտաժվելու է: Պետական-իրավական հարցերի մշտական հանձնաժողովի անդամ Վահագն Հովակիմյանն ասաց, որ հանձնաժողովում քննարկման առարկա է դարձել այն հարցը, թե արդյոք ուսումնասիրվել են նաև մարզերը, թե միայն Երևանի օրինակով է հարցն ուսումնասիրվել:

Ըստ նրա` այս փոփոխությունները կարող են խառնաշփոթ ստեղծել մարզերի համար: Նա հավելեց, որ փոփոխությունների շնորհիվ Երևանում այլևս դատավորները չեն կարողանա կասեցնել ապօրինի շինությունների քանդման որոշումներ: Երբ վարչական շրջանի ղեկավարը քանդման որոշում է կայացնում, դա պետք է իրագործվի:

Հովակիմյանի խոսքով` փաթեթում ներառված մյուս օրենքների կարգավորման հարցով կառավարությունը համապարփակ փաթեթ է մշակում, որով խնդրին լուծում կտրվի:

Պետական-իրավական հարցերի մշտական հանձնաժողովի փոխնախագահ Աննա Կարապետյանն էլ ասաց, որ թյուրիմացություն է եղել, հանձնաժողովականները մտածել են, թե քվեարկում են մեկ նախագծի փոփոխություններին, սակայն չէր կարող փաթեթից մայր օրենքը դուրս գալ և մնար միայն հարակից նախագիծը, ուստի առաջարկեց ձեռնպահ մնալ փոփոխություններից:

Քվեարկությունից առաջ «Իմ քայլը» խմբակցության ղեկավար Լիլիթ Մակունցն ասաց, որ խմբակցությունն ազատ կքվեարկի, քանի որ նախագծի գլխադասային հանձնաժողովի անդամների կարծիքները կիսվել են:

Նախագիծը դրվեց քվեարկության և մերժվեց 37 կողմ, 13 դեմ և 15 ձեռնպահ հարաբերակցությամբ` չստանալով նախագծի ընդունման համար անհրաժեշտ ձայներ: