Անկախ պատգամավոր Սոֆիա Հովսեփյանն այն կարծիքին է, որ մեկ անձի տեղափոխումը մի պաշտոնից մեկ այլ պաշտոնի, չի կարող խոսել կառավարության դեմքը փոխելու մասին: Այս մասին խորհրդարանում լրագրողների հետ զրույցում ասաց նա` անդրադառնալով Արայիկ Հարությունյանի նշանակմանը վարչապետի աշխատակազմի ղեկավարի պաշտոնում: Հիշեցնենք, որ մինչ այժմ նա զբաղեցնում էր վարչապետի գլխավոր խորհրդականի պաշտոնը, ավելի վաղ` ԿԳՄՍ նախարարի պաշտոնը:

«Եթե մի անձը չի հաջողել մի պաշտոնում, և հնարավորություն է տվել երկրորդ պաշտոնի, որտեղ նույնպես չի հաջողել, արդեն հարց է առաջ գալիս` միտում է սա, թե անկարողություն: Երկու դեպքում էլ աններելի է, եթե երրորդ անգամ հնարավորություն է տրվում, անհասկանալի է, թե որքան կարող են պետության կործանման վրա խաղ խաղալ»,-ասաց Հովսեփյանը:

Պատգամավորի կարծիքով` 2018 թվականի փոփոխություններից հետո հանրության ակնկալիքը նաև գործունակ կադրերի գործողություններից էր կախված, սակայն, ըստ նրա, իշխանությունների ապիկարությունը հաղթեց:

«Եւ մենք տեսանք, որ երեք տարում վերադարձել ենք այն անցյալը, ոը մերժել ենք»,-ասաց նա:

Ըստ պատգամավորի`ամբողջ քարոզարշավի ընթացքում ճանապարհների մասին խոսելն ու խոստումներ տալն անլուրջ է:

«Մենք չենք կարող խոսել այլևս էդ մասին, մենք կորցրել ենք ազգային դիմագիծը ու խոսում ենք ճանապարհների մասին: Եթե մեր ազգային դիմագիծը ճանապարհների կառուցումն է, ես ուրանում եմ էդ կառուցումները: Մենք վտանգել ենք պետականությունը և կադրերին մի պաշտոնից ավելի հարմար պաշտոնի ենք տեղավորում»,-ասաց նա:

Հովսեփյանի համոզմամբ` նոյեմբերի 9-ի իրադարձություններից հետո կառավարությունն ամբողջական կազմով պետք է փոխվեր, սակայն ընտրություններից հետո նույն մարդկանց տեսնում էլ ավելի պատասխանատու պաշտոններում տեսնելը խոսում է այն մասին, որ իշխանությունը դասեր չի քաղել եղածից: