Հունիսի 24-ին «Հետքի» նկարահանող խումբը եղել է հեռուստաաշտարակի մոտ գտնվող Նորքի անտառում։

Տարածքում ապրող բնակիչները մտահոգված են՝ դժվարությամբ պահպանված անտառները չեն ոռոգվում։ Խիստ շոգ եղանակին ոռոգման բացակայությունը հրդեհների մեծ ռիսկ է առաջացնում։ Միայն հունիս ամսին անտառում արդեն երկու անգամ հրդեհ է բռնկվել։ 

Ասում են՝ դիմել են «Հայանտառ» ՊՈԱԿ-ին, բայց խնդիրը այդպես էլ լուծում չի ստանում։ Բնակիչները նաև պնդում են, որ չոռոգելու պատճառը ոչ թե ջրի բացակայությունն է, այլ  կապված է ջրամատակարարի հետ, որը պարբերաբար կողպեքով փակում է ոռոգման պտուտակը։

«Հայանտառը» իր հերթին պնդում է, որ «Նորքի անտառում ոռոգման համակարգը անխափան աշխատում է», և որ «պարբերաբար իրականացնում են ոռոգման աշխատանքներ»։ Ըստ «Հայանտառի» տնօրենի տեղակալ Սիմոն Պետրոսյանի, «Հայանտառն» ունի պայմանագիր մատակարար կազմակերպության հետ և անհրաժեշտության դեպքում պատվիրում է ոռոգման ջուր և վճարում է դրա համար։

Անտառ կոյուղաջրեր են լցվում։ Բնակիչների պնդմամբ՝ դա Հ1-ի շենքից դուրս եկող կոյուղաջրերի մի մասն է։ Տարիներ առաջ վթար է եղել, որը այդպես էլ չի վերացվել։ Այս հարցը նույնպես երկար ժամանակ է, ինչ վերջնական լուծում չի ստանում, խնդիրը շտկելու բոլոր փորձերը եղել են ոչ լիարժեք։

Հ1-ի աշխատակիցը մեզ ասաց, որ անտառ թափվող կոյուղաջրերի վերաբերյալ լիարժեք տեղեկություններ չունեն և հորդորեց դիմել ջրահեռացումն իրականացնող ընկերություն։

Մանրամասները՝ տեսանյութում։