Իտալիայի հավաքականը հաղթեց Իսպանիային և դուրս եկավ Եվրո-2020-ի եզրափակիչ
Ֆուտբոլի Եվրոպայի առաջնության կիսաեզրափակչում Իտալիայի ազգային հավաքականը պարտության մատնեց Իսպանիայի ընտրանուն և դուրս եկավ եզրափակիչ։ Հանդիպումը տեղի ունեցավ Լոնդոնի «Ուեմբլի» մարզադաշտում։
Հանդիպման առաջին խաղակեսն անցավ գրեթե հավասար պայմաններում, թիմերը փոխնեփոխ գրոհներ էին կազմակերպում, սակայն առաջին 45 րոպեների ընթացքում թիմերից և ոչ մեկը չկարողացավ խոցել մրցակցի դարպասը։
Երկրորդ խաղակեսը մեկնարկեց իսպանացիներիի տարածքային և խաղային առավելությամբ, սակայն գրոհեց Իսպանիան, հաջողության հասավ Իտալիան։ 60-րդ րոպեին Ֆեդերիկո Կիեզան բացեց հանդիպման հաշիվը՝ պտտեցրած հարվածով գնդակն ուղարկելով Իսպանիայի հավաքականի դարպասը։
Ընդունած գոլից հետո իսպանացիները չհանձնվեցին և 80-րդ րոպեին կարողացան հավասարեցնել հաշիվը։ Գեղեցիկ գրոհը դիպուկ հարվածով եզրափակեց Ալվարո Մորատան և խաղը տեղափոխվեց լրացուցիչ ժամանակ։
Լրացուցիչ ժամանակում ևս հաշիվն անփոփոխ մնաց և դիմակայության ելքը վճռվեց հետխաղյա 11-մետրանոց հարվածաշարում, որտեղ բախտը ժպտաց իտալացիներին (4:2):
Այսպիսով, Իտալիայի հավաքականը դուրս եկավ Եվրո-2020-ի եզրափակիչ, որտեղ նրա մրցակիցը կլինի Անգլիա-Դանիա զույգի հաղթողը։ Այդ հանդիպումը կկայանա հուլիսի 7-ին՝ Երևանի ժամանակով 23։00-ին։
Լուսանկարները՝ ՈՒԵՖԱ-ից և Իսպանիայի հավաքականի Թվիթերի էջից
Մեկնաբանել