Մրցակցության պաշտպանության հանձնաժողովը դիտարկել է մամուլում հրապարակված, ինչպես նաև քաղաքացիների կողմից բարձրացված հարցադրումները շաքարավազի շուկայում առկա իրավիճակի վերաբերյալ:

Հանձնաժողովի հաղորդմամբ՝ կատարված ճշգրտումների արդյունքներով, նախնական տվյալների համաձայն՝ շաքարավազի շուկայում արհեստական պակասուրդ առկա չէ:

«Ինչ վերաբերում է շաքարավազի գնին, ապա հայտնում ենք, որ խոշոր առևտրային ցանցերում իրականացված դիտանցումների արդյունքում պարզվել է, որ ընթացիկ տարվա մայիսից նկատվում է շաքարավազի գների նվազման միտում:

Մասնավորապես հուլիսին կգ-ով վաճառվող շաքարավազի 1 կգ-ի գինը շուրջ 20 դրամով նվազել է և այժմ կազմում է շուրջ 370 դրամ:

Հարկ է նշել, շաքարավազը վաճառվում է ինչպես կգ-ով, այնպես էլ փաթեթավորված, և դրանց գները տարբերվում են: Հիշեցնում ենք, որ Հանձնաժողովը օրեր առաջ հանդես էր եկել հրապարակմամբ մի շարք ապրանքների, այդ թվում շաքարավազի գների մոնիթորիգի արդյունքների վերաբերյալ:

Հորդորում ենք արհեստական պակասուրդի, ինչպես նաև գների բարձրացման վերաբերյալ փաստերի առկայության դեպքում դիմել Հանձնաժողով և զերծ մնալ չհիմնավորված և հանրությանը ապակողմնորոշող մեկնաբանություններից»,- ասված է Մրցակցության պաշտպանության հանձնաժողովի հաղորդագրության մեջ:

• Խանութներում շաքարավազ չկա. արհեստական դեֆիցի՞տ, թե՞ դատարկ պահեստներ

Թարմացում։ Ավելի ուշ, Մրցակցության հանձնաժողովը ևս մեկ հաղորդագրություն է տարածել՝ այս անգամ շեշտելով որ ոչ միայն արհեստական դեֆիցիտ (պակասուրդ)  չի արձանագրել շաքարավազի շուկայում, այլև՝ առհասարակ դեֆիցիտ չի արձանագրել։