Այսօր Երևանում մեկնարկել են Առողջապահության համաշխարհային կազմակերպության (ԱՀԿ) և Ազգային բժշկական ասոցիացիաների եվրոպական ֆորումի համատեղ եռօրյա վեհաժողովը և ԱՀԿ ղեկավար կազմի խորհրդակցությունը, որին մասնակցում են մոտ 30 երկրի ազգային բժշկական ասոցիացիաների նախագահներ, ներկայացուցիչներ:

Միջոցառմանը բացման խոսքով հանդես է եկել ՀՀ առողջապահության նախարար Հարություն Քուշկյանը: Նա նշել է, որ Եվրոպական տարածաշրջանի 50 երկրները, թեև շատ տարբեր են, սակայն հաճախ ունենում են միևնույն բժշկական խնդիրները: Այդ խնդիրը մեղմվում են, եթե այդ երկրները համագործակցում են' ձևավորելով առողջապահության քաղաքականության սկզբունքները և համատեղ ուժերով հաղթահարելով երկրների առողջապահական համակարգերի առջև ծառացած խնդիրները:

Հարություն Քուշկյանը ընդհանուր խնդիրներից նշել է ժողովրդագրական տեղաշարժերը, ներքին և արտաքին միգրացիան, տարբեր տիպի բժշկական խնդիրները:

Նախարարը նաև տեղեկացրել է, որ խորհրդակցության ժամանակ քննարկվելու են այն քաղաքական ուղղությունները, որոնք ուղղված են եվրոպական տարածաշրջանի նոր քաղաքականությանը' «Առողջություն 20-20», որտեղ նորատիպ հարցեր են քննարկվելու, և նորատիպ լուծումներ են տրվելու:

Հայկական բժշկական ասոցիացիայի նախագահ Պարունակ Զելվեյանը նշել է, որ տարին մեկ անգամ է նման խոշոր միջոցառում տեղի ունենում, որն այս տարի Հայաստանում է, ինչը մեծ ձեռքբերում է:

Բժշկական ասոցիացիաների եվրոպական ֆորումի նախագահ Լիա Վապները նշել է, որ նման խորհրդակցությունների ժամանակ յուրաքանչյուր երկիր արտահայտում է իր մտահոգությունները:

«Այս տարի առաջարկում ենք տնտեսական ճգնաժամը և դրա ազդեցությունը առողջապահության վրա: Ազգաբնակչությունը ճգնաժամի ժամանակ առողջապահական ավելի շատ խնդիրներ է ունենում»,- ընդգծել է Լիա Վապները: Այս մասին հայտնում է ՀՀ առողջապահության նախարարությունը: