Ռուս խաղաղապահները կատարել են Արցախի տարածքի ականազերծման պլանի 80 տոկոսը
Արցախում տեղակայված ռուսական խաղաղապահ զորախմբի հումանիտար ականազերծման ստորաբաժանումները շարունակում են Արցախի տարածքի ականազերծումը։ Ինչպես հայտնում է ՌԴ պաշտպանության նախարարությունը, ներկայում ռուս սակրավորները պայթյունավտանգ առարկաների և չպայթած զինամթերքի որոնողական աշխատանքներ են իրականացնում Մարտունու շրջանի Մաճկալաշեն գյուղի մոտակայքում։
Ռուս զինծառայողները առաջին հերթին ստուգում են գյուղի երկու հատվածներն իրար կապող ճանապարհը և բնակելի տների շրջակայքը։
«Տեղի բնակիչների հետ շփումների ընթացթում պարզ դարձավ, որ այս տարածքում կան չպայթած զինամթերքներ։ Այս պահի դրությամբ ստուգվել է 1500 հեկտար տարածք։ Աշխատանքները կշարունակվեն մեկ շաբաթ»,- ասել է հումանիտար ականազերծման խմբի զինծառայող Եվգենի Խոլոդովը։
2020թ․ նոյեմբերի 23-ից սկսած ռուսական խաղաղապահ զորախմբի սակրավորները չպայթած զինամթերքից մաքրել են 2173 հեկտար տարածք, 650 կմ ճանապարհ, 1892 բնակելի շինություն, այդ թվում՝ սոցիալական նշանակության 30 օբյեկտ։ Հայտնաբերվել և վնասազերծվել է 25 640 պայթյունավտանգ առարկա։
Ընդհանուր առմամբ, ռուս խաղաղապահները կատարել են Արցախում ականազերծման նախատեսված պլանի 80 տոկոսը։
***
2020թ․ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քելբաջարի, Աղդամի և Լաչինի շրջանները։
Լեռնային Ղարաբաղում շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորախումբը:
Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ ընդ որում շրջանցելով Շուշի քաղաքը, մնաց Ռուսաստանի խաղաղապահ զորակազմի վերահսկողության ներքո:
Զորախմբի հիմնական մասը կազմում են ՌԴ զինված ուժերի Կենտրոնական ռազմական օկրուգի 15-րդ առանձին մոտոհրաձգային բրիգադի զինծառայողները։
Լուսանկարը՝ РИА Новости / Максим Блинов
Մեկնաբանել