Ապրիլի 22-ին Երևանը կվերածվի մի մեծ տոնական հրապարակի, որի տարբեր հատվածներում, պուրակներում, հրապարակներում և երևանցիների սիրված վայրերում օրվա տարբեր ժամերին տեղի կունենան համերգներ, ներկայացումներ ու տոնական հանդեսներ:

Միջոցառումներ կանցկացվեն նաև հայ և համաշխարհային գրողների անվանակիր շուրջ 60 դպրոցներում, Երևանի 12 վարչական շրջանների կենտրոններում:

Մայրաքաղաքում տեղաշարժումը դյուրին դարձնելու նպատակով ստեղծվել է նաև ապրիլի 22-ի միջոցառումների քարտեզ՝ երկլեզու տեղեկատվությամբ, որում նշված են Երևանի փոքր կենտրոնի 25 հարթակների հասցեները, միջոցառումների անվանումներն ու ժամանակացույցը:

Պետական հանձնաժողովը տոնական միջոցառումների շրջանակում անակնկալ է պատրաստել հայ երաժշտասերների ու Երևանի հյուրերի համար:

Ապրիլի 22-ին՝ ժամը 20:00-ին, «Երաժշտական ողջույն հայ գրատպության բնօրրան Իտալիայից» խորագրով տեղի կունենա աշխարհահռչակ տենոր Անդրեա Բոչելիի տոնական մենահամերգը Ազատության հրապարակում՝ Հայաստանի պետական ֆիլհարմոնիկ նվագախմբի, պետական կամերային և «Հովեր» երգչախմբերի մասնակցությամբ:

Համերգային ծրագրում Բոչելին կներկայացնի օպերային արվեստի դասականների ու ժամանակակից կոմպոզիտորների լավագույն ստեղծագործությունների ընտրանին՝ սկսած Գայտանո Դոնիցետիի, Ջակոմո Պուչինիի, Ջուզեպե Վերդիի, Բիզեի ստեղծագործություններից մինչև Նինո Ռոտայի երաժշտությունը:

Օրվա տոնական միջոցառումների գագաթնակետը Մատենադարանի հարակից տարածքում ՅՈւՆԵՍԿՕ-ի «Գրքի համաշխարհային մայրաքաղաք» տիտղոսի փոխանցման շքեղ հանդիսությունն է: Կհնչի Երևանի հիմնը Հայաստանի պետական ակադեմիական երգչախմբի կատարմամբ:

Հյուրերին կողջունեն Հայատառ տպագրության հիմնադրման 500-ամյակի միջոցառումները նախապատրաստող պետական հանձնաժողովի քարտուղար Վիգեն Սարգսյանը, ՅՈւՆԵՍԿՕ-ի գլխավոր տնօրենի 1-ին տեղակալ Էնգիդա Գետաչյուն, ՅՈւՆԵՍԿՕ-ի 36-րդ գլխավոր կոնֆերանսի նախագահ Կատալին Բոջիարդը, Գրադարանների ասոցիացիայի և ինստիտուտների միջազգային ֆեդերացիայի նախագահ (IFLA) Ինգրիդ Պարենտը, Հրատարակիչների միջազգային ասոցիացիայի նախագահ (IPA) Տրասվիկ Ժիտիդեչարակը: Որպես պատվավոր հյուր՝ միջոցառմանը կմասնակցեն նաև 2013 թ. գրքի համաշխարհային մայրաքաղաքի՝ Բանգկոկի ներկայացուցիչները:

Խորհրդանշական է, որ հենց Մատենադարանի հարթակում տեղի կունենա «Երևան՝ գրքի համաշխարհային մայրաքաղաք» տիտղոսի հանդիսավոր փոխանցումը. Բուենոս Այրեսի քաղաքապետ Մաուրիցիո Մակրին տիտղոսը կփոխանցի Երևանի քաղաքապետ Տարոն Մարգարյանին:

Արգենտինյան, թայլանդական և հայկական պարախմբերի ելյութներից հետո Մատենադարանի կոթողային շենքի ճակատային պատին կներկայացվի եռաչափ գրաֆիկական, տեսապատկերային ծրագիրը և շքեղ հրավառություն:

Լուս.՝ andreabocelli.com կայքից