Տավուշի մարզի Այրում համայնքի Դեբեդավան, Պտղավան, Հաղթանակ և Բագրատաշեն բնակավայրերի տարածքներում սահմանային Դեբեդ գետի վարարումների պատճառով քանդվել է գետի ափապաշտպան արգելաթումբը, որի հետևանքով փոփոխվել է գետի հունը, որն էլ առաջացրել է հայ-վրացական պետական սահմանի տեղադիրքի փոփոխություն դեպի ՀՀ տարածք:

Դեբեդավան բնակավայրի տարածքի 2 հա գյուղատնտեսական նշանակության հողատարածք մնացել է գետի ձախ ափին՝ Պտղավան, Հաղթանակ և Բագրատաշեն բնակավայրերի տարածքներում, մասնավորապես՝ Երևան-Թբիլիսի Մ-6 միջպետական ավտոմայրուղուն հարող հատվածներում քանդվել են ԱԱԾ սահմանապահ զորքերի վերակարգի հետիոտնի և մեքենաների տեղաշարժի համար նախատեսված սահմանային ճանապարհները:

Արարատի մարզում էլ Արաքս գետը վարարումների հետևանքով ողողել և քանդել է արգելաթումբը,  իսկ Արմավիրում՝ արմատախիլ արել ծառեր և թփուտներ։ Արմավիրում ափապաշտպան արգելաթմբի քանդման և հարակից տարածքների ջրածածկման վտանգ կա։ 

Կառավարությունը նախատեսում է վերականգնել Արաքս գետի ձախ ափի և Դեբեդ գետի վարարումների հետևանքով ողողված և վտանգավոր հատվածները։ 

Դեբեդ գետի ափի Պտղավան բնակավայրի երեք տեղամասերում սահմանային ճանապարհի վերականգնման և ափի ամրացման աշխատանքների համար պահանջվում է 275 մլն դրամ, Բագրատաշեն բնակավայրի երկու տեղամասերի համար՝ 95 մլն դրամ, Հաղթանակ բնակավայրի տեղամասի համար՝ 215 մլն դրամ:

Արարատում նշված աշխատանքների համար կառավարությունը կհատկացնի 59 մլն 200 հազար դրամ, իսկ Արմավիրում՝ 28 մլն 200 հազար դրամ։