Մենք` Մաշտոցի պուրակի ապօրինի շինությունների դեմ պայքարող քաղաքացիներս համերաշխություն ենք հայտնում Բրյուսովի համալսարանի ուսանողներին: Ձեր զանգվածային ու կարգապահ բողոքով դուք պատմական օրինակ եք ցույց տալիս ամբողջ Հայաստանի ուսանողության համար:

Մենք համոզված ենք, որ անկախ կողմնորոշումներից և անձերի նկատմամբ համակրանքից` դուք նախևառաջ ոտքի եք ելել պաշտպանելու արդարությունն ու օրինականությունը: Բրյուսովցիներից շատերն ամիսներ շարունակ կանգնած են Մաշտոցի պուրակում` ի պաշտպանություն հանրային տարածքի:

Մենք ցանկանում ենք դառնալ ինքնորոշված քաղաքացիների սերունդ և ապրել մի երկրում, որտեղ օրենքը կհարգեն բոլորը, այդ թվում նաև բարձրաստիճան պաշտոնյաները` լինի քաղաքապետ, թե նախարար: Բոլորին, ովքեր հանկարծակիի են եկել մեր օրինական պահանջներից, մենք հայտարարում ենք, որ տեր ենք կանգնելու մեր համալսարանին, մեր քաղաքին և մեր պետությանը:

Հայկական ինքնորոշված ուսանողների շարժումն ընդդեմ կամայականությունների կարող է իսկապես փոխել մեր երկիրը` բարձր կազմակերպվածության, օրինապահության և ինքնուրույնության շնորհիվ:

Մենք քաջալերում ենք ձեր արդար պայքարը և բաց ենք համագործակցության համար հանուն քաղաքացիական Հայաստանի և ինքնորոշված քաղաքացու:

Ինքնորոշված ուսանողնե՜ր, մենք ձեզ հետ ենք:

Չկա մի ուժ, որ կկանգնեցնի Հայաստանի հանրության ինքնորոշումը: 

Մենք ենք այս քաղաքի տերը քաղաքացիական նախաձեռնություն

Մեր քաղաքը հանրային-քաղաքացիական նախաձեռնություն

Թռչկան քաղաքացիական նախաձեռնություն

Փրկենք Թեղուտը քաղաքացիական նախաձեռնություն 

20.04.2012