Բարձրագույն դատական խորհուրդն այսօր հրապարակեց որոշում, որով մերժեց Կառուպցիայի կանխարգելման հանձնաժողովի միջնորդությունը՝ ԲԴԽ նախագահ Ռուբեն Վարդազարյանին (լիազորությունները ժամանակավորապես կասեցված են) կարգապահական պատասխանատվության ենթարկելու վերաբերյալ: Այս մասին «Հետք»-ի հետ զրույցում ասաց ԲԴԽ մամուլի խոսնակ Լիլիթ Շաբոյանը:

Վարդազարյանին կարգապահական պատասխանատվության ենթարկելու միջնորդությունը ներկայացրել էր Կոռուպցիայի կանխարգելման հանձնաժողովը՝ պնդելով, որ Վարդազարյանի եկամուտների վերաբերյալ հայտարարագրում 13-14 անճշտություն կա:

Կոռուպցիայի կանխարգելման հանձնաժողովի պնդմամբ՝ Վարդազարյանի բանկային տվյալների քաղվածքից պարզ է դառնում, որ նրա հաշվին առնվազն երեք տարի նույն տեսակի գումար է մուտքագրվել, որը փոխանցող սուբյեկտը, փոխանցման նպատակը հայտնի չեն, այդ գումարի վերաբերյալ տվյալներ առկա չէ նաև Վարդազարյանի հայտարարագրում:

Նշենք, որ Վարդազարյանն ու վերջինիս ներկայացուցիչը կարգապահական պատասխանատվության ենթարկելու վերաբերյալ ԲԴԽ նիստին չեն ներկայացել, Վարդազարյանը միայն գրավոր առարկություններ է ներկայացրել, նշել, թե հարցերի դեպքում պատրաստ է գրավոր պատասխանել:

Հիշեցնենք, որ Վարդազարյանի լիազորությունները ժամանակավորապես կասեցվել են՝ ՀՔԾ-ում նրա վերաբերյալ քննվող քրեական գործով պայմանավորված: Վարդազարյանը մեղադրվում է արդարադատության իրականացմանը խոչընդոտելու մեջ: Նրան մեղադրյալ ներգրավելու որոշումը պաշտպանական կողմը բողոքարկել է դատարան, և Երևանի ընդհանուր իրավասության դատարանի դատավոր Դավիթ Հարությունյանը բավարարել է բողոքն ու վարույթն իրականացնող մարմնին պարտավորեցրել վերացնել Վարդազարյանի իրավունքների խախտումը: Ըստ դատարանի վերլուծության՝ Վարդազարյանին մեղադրյալ ներգրավելիս նրա անձեռնմխելիությունը հաղթահարված չի եղել: Այս որոշումը դատախազությունը բողոքարկել է Վերաքննիչ դատարան: