![](/static/articles/01/33/82/l-EokbrdxS1P.jpg)
Արմավիրի քաղաքապետը ՀՀԿ-ի քարոզարշավ է իրականացնում մանկապարտեզներում
Արդեն մի քանի օր է` Արմավիրի հանրապետական քաղաքապետ Ռուբեն Խլղաթյանը հանդիպումներ է ունենում քաղաքապետարանի ենթակայության տակ գործող մանկապարտեզների աշխատակիցների եւ երեխաների ծնողների հետ: Ծնողներից մեկը պատմեց, որ մանկապարտեզի տնօրինությունն իրեն ստիպողաբար է բերել հանդիպման, եւ նշել են` եթե չգաս «ձեր համար վատ կլինի»: Քաղաքապետն իր հանդիպումներում բոլորին կոչ է անում քվեարկել ՀՀԿ-ի օգտին, իսկ թիվ 21 ընտրատարածքում ընտրել ՀՀԿ-ի թեկնածու Ալեքսան Պետրոսյանին (ՄԱՊ-ի Ալիկ):
Ռուբեն Խլղաթյանը, երբ օրեր առաջ այցելել է Արմավիրի թիվ 7 մանկապարտեզ եւ հերթական անգամ հորդորել քվեարկել միայն ՀՀԿ-ի ու Ալեքսան Պետրոսյանի օգտին, երկու ծնող հայտարարել են, թե չեն ընտրելու մատնանշված կուսակցությանն ու թեկնածուին, ինչից հետո քաղաքապետը խիստ բարկացել է եւ նույնիսկ պահանջել նրանց երեխաներին հանել մանկապարտեզից:
Թիվ 7 մանկապարտեզի տնօրեն Գայանե Աղաջանյանը «Հետքի» հետ հեռախոսազրույցում չժխտեց, որ քաղաքապետը այցելել է մանկապարտեզ եւ ընտրությունների թեմայով զրուցել իրենց եւ ծնողների հետ:
«Հանդիպում ունեցել է, չեմ առարկում, թե հանդիպում չի եղել: Ո՞վ է իրենց կամքի վրա բռնանում` կընտրեն, թե չեն ընտրի, ում ուզում են թող ընտրեն, ուղղակի խոսակցությունը եղել է այնպես, որ քաղաքապետը հայտարարեց, թե ինքն ուզում է, որ մասնակցենք ընտրություններին: Մի ծնող ասեց, որ ինքը չի մասնակցելու, քաղաքապետն էլ ասաց, թե ում ուզում եք ընտրեք, բայց անպայման մասնակցեք: Ընդամենն այդքան բան է եղել, ուրիշ ոչ մի բան չի եղել: Ձեզ ազնվությամբ ասում եմ, որ այդ հանդիպմանը ոչ մի թեկնածուի անուն չի շոշափվել:1000 տոկոսով ասում եմ, որ ոչ մի թեկնածուի անուն չի տրվել»,-վստահեցրեց Գայանե Աղաջանյանը:
Նա հերքեց նաև որեւէ երեխայի հեռացումը մանկապարտեզից` ասելով, թե բոլորն էլ հաճախում են:
Երբ մանկապարտեզի տնօրենին հարցրինք, թե ինչու է քաղաքապետը նման հանդիպումներ ունենում, եթե կոնկրետ թեկնածուի անուն չի տալիս, Գայանե Աղաջանյանի լսողությունն այդ պահին «վատացավ», եւ չլսեց իմ հարցերը: Ուղիղ 3 րոպե նա նորից ճշտում էր իմ անուն-ազգանունն ու լրատվամիջոցի ունվանումը` այդպես էլ չպատասխանելով կոնկրետ հարցին:
Փորձեցինք զրուցել և պարզաբանումներ ստանալ անձամբ քաղաքապետից, սակայն նա չպատասխանեց հեռախոսազանգերին:
Մեկնաբանություններ (2)
Մեկնաբանել