Այս օրերին մի խումբ ՕԵԿ-ականներ Արմավիրի մարզում համատարած անձնագրերի պատճենների հավաքագրմամբ են զբաղված: Նրանք այցելում են տներ եւ ընտրելու իրավունք ունեցող քաղաքացիներից նախ տեղեկանում են, թե մայիսի 6-ի ընտրություններին արդյոք նրանք ՕԵԿ-ին են ձայն տալու: Դրական պատասխան ստանալուց հետո խոստանում են 4 օր հետո ընտանիքին նվիրել բջջային հեռախոս, զեղչերի քարտ եւ հեռախոսի լիցքավորման քարտեր:

«Օրինաց երկրում» այնքան «բարի» են, որ կուսակցական պատկանելությունը կապ չունի նվեր ստանալու համար, ոչ էլ մարդկանց ստիպում են անդամագրվել կուսակցությանը, սակայն գլխավոր պայմանը մեկն է` քվեարկել ՕԵԿ-ի համար: ՕԵԿ-ի «նվիրած» հեռախոսահամարը սակագնային փաթեթ է, եւ իրար մեջ քաղաքացիները կարող են անվճար խոսել:

Կուսակցության այս «ակցիան» գալիս է փոխարինելու օրեր առաջ բաժանված ջեմի, դդումի մուրաբայի ու գյուղացիների բնորոշմամբ` «ոչխարի հոտով» օծանելիքի իրականացված «ակցիային»: