Ձեռնարկատիրական ապօրինի գործունեություն իրականացնելու հետևանքով պետությանն առանձնապես խոշոր չափերի վնաս է պատճառվել
ԱԱԾ-ն տեղեկացնում է, որ ՊԵԿ օպերլիազորի թողտվությամբ՝ պետությանը պատճառվել է առանձնապես խոշոր չափերի վնաս:
Ազգային անվտանգության ծառայության Շիրակի մարզային վարչության բացահայտած հանցագործությունների դեպքերով ԱԱԾ քննչական դեպարտամենտում կատարված քննությամբ պարզվել է, որ ՊԵԿ համապատասխան բաժնի օպերլիազորը, տեղյակ է եղել, որ բժշկական օգնությամբ և սպասարկմամբ զբաղվող 5 անձ առանց պետական գրանցման և առանց հատուկ թույլտվության լիցենզավորման ենթակա ձեռնարկատիրական գործունեություն են իրականացրել: Իրավախախտումներ կատարած անձանց նկատմամբ չի կիրառել պատասխանատվության միջոցներ նրանց կողմից կատարված ապօրինի ձեռնարկատիրական գործունեությունը դադարեցնելու ուղղությամբ:
Դրա արդյունքում նշված անձինք խուսափել են օրենքով սահմանված հարկային պարտավորությունները կատարելուց, որպիսի գործողությունների հետևանքով պետությանը գույքային վնասի ձևով պատճառվել է առանձնապես խոշոր չափի վնաս:
ԱԱԾ հաղորդագրության համաձայն՝ ՊԵԿ օպերլիազորը իր սպասարկման տարածքում քարի արտադրությամբ զբաղվող ընկերությունների խախտումները չարձանագրելու, օրենքով սահմանված կարգով պատասխանատվության միջոցներ չկիրառելու, ինչպես նաև հնարավոր ստուգումների մասին տնտեսվարողին նախապես տեղյակ պահելու և նրա կատարած խախտումները քողարկելու ուղղությամբ խորհուրդներ տալու համար 2020 թվականի ապրիլից հունիսն ընկած ժամանակահատվածում պահանջել և նրանցից առձեռն ստացել է կաշառքի գումարներ:
Նախաքննության ընթացքում վերականգնվել է պետությանը պատճառված վնասի հիմնական մասը, կալանք է դրվել մեղադրյալներին պատկանող դրամական միջոցների և անշարժ գույքի վրա:
Քրեական գործը 7 անձի մասով մեղադրական եզրակացությամբ ուղարկվել է նախաքննության օրինականության նկատմամբ հսկողություն իրականացնող դատախազին՝ այն հաստատելու և դատարան ուղարկելու համար:
Մեկնաբանել