Իրանի նախագահ Էբրահիմ Ռայիսին երդմնակալության պաշտոնական արարողության ժամանակ հայտարարել է, որ Իրանը մտադիր չէ ստեղծել միջուկային զենք, ինչը տեղ չունի երկրի պաշտպանական ռազմավարության մեջ։ Այդ մասին գրում է РИА Новости-ն։ 

«Իրանի միջուկային ծրագիրը բացառապես խաղաղ է և համաձայն, Գերագույն առաջնորդի ֆաթվայի, միջուկային զենքն արգելված է և տեղ չունի Իրանի պաշտպանական ռազմավարության մեջ»,- Ռայիսիի խոսքերը մեջբերել է IRIB պետական հեռուստատեսությունը։

Հիշեցնենք, որ հինգշաբթի օրը՝ օգոստոսի 5-ին Իրանում կայացել է նորընտիր նախագահ Էբրահիմ Ռայիսիի երդմնակալության պաշտոնական արարողությունը, որին մասնակցել է նաև ՀՀ վարչապետ Նիկոլ Փաշինյանը։ Այն կայացել է Իրանի խորհրդարանի շենքում, որին մասնակցել են Իրանի դատական և օրենսդիր իշխանության ղեկավարները, բարձրաստիճան զինվորականներ, աշխարհի 80 երկրներից ավելի քան 200 հյուրեր։ Օգոստոսի 3-ի առավոտյան էլ կայացել էր Իրանի գերագույն առաջնորդ Ալի Խամենեի կողմից Ռայիսիի հաստատման արարողությունը։

Իրանն իր միջուկային ծրագրի ակտիվ զարգացումը սկսել է նախկին նախագահ Մահմուդ Ահմադինեժադի նախագահության տարիներին (2005-2013 թվական)։ Միևնույն ժամանակ ՄԱԳԱՏԷ-ն մշտական ստուգումներ էր սկսել Իրանի միջուկային օբյեկտներում, որը վերջին հաշվով հաստատեց իրանցիների կողմից միջուկային զենքի ստեղծման աշխատանքները։ Այդ ժամանակ, ի պատասխան Իրանի գործողությունների, ԱՄՆ-ն ու Եվրոպական երկրները պատժամիջոցներ սկսեցին սահմանել Իրանի ֆինանսական հատվածի, էներգառեսուրսների և զինամթերքի արտահանման վրա։ Արդյունքում, իրանական տնտեսությունն էականորեն տուժեց։

Իրավիճակը որոշակիորեն կարգավորվեց 2015 թվականին՝ Հասան Ռոհանիի կառավարության ջանքերի շնորհիվ։ Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ն, Ֆրանսիան ու Իրանը կնքեցին Համատեղ համապարփակ գործողությունների ծրագիրը։ Թեհրանը սահմանափակեց իր միջուկային ծրագիրը, իսկ նրա վրայից հանվեցին պատժամիջոցները։ Սակայն 2018 թվականի մայիսին ԱՄՆ-ն դուրս եկավ գործարքից և վերականգնեց Իրանի նկատմամբ պատժամիջոցները։ Ի պատասխան Թեհրանը հայտարարեց համաձայնագրի շրջանակներում իր պարտավորությունների աստիճանական կրճատման մասին։

Ներկայումս Վիեննայում բանակցություններ են ընթանում Համատեղ համապարփակ գործողությունների ծրագրի վերականգնման և Միացյալ Նահանգների կողմից պատժամիջոցների վերացման հարցերի ուղղությամբ։ Հունիսի 20-ին ավարտվել է բանակցությունների վեցերորդ փուլը։ Բանակցող կողմերը, գրեթե 90 %-ով, հասել են 2015 թվականին ձեռքբերված պայմանավորվածությունների վերականգնման որոշման ընդունմանը։

Լուսանկարը՝ vocaleurope.eu-ից