«ՉԻ» տեղեկություններով՝ Գեղարքունիքի մարզում նախընտրական ֆոնի վրա զարգացող ինտրիգները նոր թափ են ստանում: ՀՀԿ-ական նախկին մարզպետ Ռուդիկ Ղուկասյանի՝ Ուդոյի ու վերջինիս թիմակից, նախկին ՀՀԿ-ական կարկառուն պատգամավոր Ալիկ Պետրոսյանի՝ «Լոբի Ալիկի» ճանապարհները խաչվել են, քանի որ նրանցից ամեն մեկը ընտրական գործընթացների մեջ իր դերակատարությունն է ստանձնել յուրովի:

Եվ եթե ՀՀԿ-ական Ռուդիկ Ղուկասյանը մարզի որոշ ընտրատարածքներում «պադերժկա» է անելու հարազատ կուսակցությանն ու ՀՀԿ-ի կողմից մեծամասնական ընտրակարգով առաջադրված թեկնածուներին, ապա որոշ դեպքերում էլ, օրինակ, թիվ 23 ընտրատարածքում, նա սատար է կանգնելու իր մտերիմ ընկեր, ԲՀԿ-ական Էդուարդ Սահակյանին, ում հետ բավականին երկար ճանապարհ է անցել:

Իսկ ահա ՀՀԿ-ական Ալիկ Պետրոսյանն էլ՝ «Լոբի Ալիկը», ում լավ աշխատելու դեպքում ՀՀԿ-ն մարզում պաշտոն է խոստացել, այս օրերին ամբողջ հոգով լծվել է ՕԵԿ-ի համար ձայներ բերելու գործին, ինչը նրան կարծես թե ամենևին չի հաջողվում:

«ՉԻ» հասած տեղեկությունների համաձայն՝ «Լոբի Ալիկը» երեկ Ծովագյուղ և Նորադուս համայնքներում լուրջ դիմադրության է հանդիպել ընտրողների կողմից, որոնց նա փորձել է համոզել իրենց ձայնը տալ ՕԵԿ-ին և ուրիշ ոչ մեկին: Տեղի բնակիչներից շատերը մի լավ տեղն են դրել ՀՀԿ-ական կրծքանշանով ՕԵԿ-ական «լիազորին»՝ ասելով. «Ծոծրակներդ կտեսնեք, ձայն չեք տեսնի, էդ էր մնացել գնանք Արթուր Բաղդասարյանին ընտրենք: Մինչև էսօր ավանդների ենք սպասում…»