«Արմենիա» միջազգային օդանավակայաններ» ՓԲԸ-ն տեղեկացնում է, որ Lufthansa-ն շաբաթական երեք թռիչք կիրականացնի Ֆրանկֆուրտի իր հանգույց՝ առաջարկելով ավելի քան 150 տարանցիկ ուղղություն: Lufthansa խմբի չորս ավիաընկերություն շաբաթական 16 անգամ մեկնում է Երևանից:

«Ուրբաթ օրը վաղ առավոտյան՝ տեղական ժամանակով 03:25-ին, Lufthansa-ն երկար տարիներ անց նորից վայրէջք կատարեց «Զվարթնոց» միջազգային օդանավակայանում:

Ավիաընկերությունը հպարտությամբ բացեց իր նոր ուղղությունը՝ Ֆրանկֆուրտից դեպի մայրաքաղաք Երևան: Օդանավը դիմավորեցին ավանդական ջրային կամարով և ղեկավար կազմով: Այս նոր կանոնավոր ուղիղ թռիչքը կիրականացվի ամեն կիրակի, երեքշաբթի և հինգշաբթի երեկոյան Գերմանիայի Ֆրանկֆուրտ քաղաքից, և վայրէջք կկատարի Երևանում գիշերը՝ լուսաբացին:

Երևանից Ֆրանկֆուրտ հետադարձն առաջարկվում է երկուշաբթի, չորեքշաբթի և ուրբաթ օրերին՝ ապահովելով ժամանումը Ֆրանկֆուրտ առավոտյան ժամը 06:50-ին: Սա Հայաստանից մեկնող բոլոր ուղևորներին ընձեռում է ամեն հնարավորություն` հեշտությամբ շարունակեու ճանապարհն այլ ուղղություններով՝ հատկապես Ատլանտյան օվկիանոսից այն կողմ:

Գերմանական ավիափոխադրողը Հայաստանում սկսում է այս նոր կանոնավոր չվերթերը՝ դուստր ընկերության՝ Eurowings-ի Քյոլն նոր երթուղու մեկնարկից մեկ շաբաթ անց:

Այն շահագործում է 138 նստատեղ ունեցող Airbus A319-ը՝ ուղևորներին ընձեռելով չորս ժամվա ընթացքում ամբողջ աշխարհից դեպի Հայաստան և Հայաստանից ճամփորդելու հնարավորություն:

Դեպի Ֆրանկֆուրտ այս նոր երթուղին, որն անցնում է 2999 կմ կամ 1615մղոն ճանապարհ, հայերի համար կարևոր ուղղություն կլինի՝ այցելելու և հանդիպելու ամբողջ աշխարհում իրենց համայնքներին ու ընտանիքներին: Շատ եվրոպական տուրիստական ուղղություններ, ինչպիսիք են Իտալիան, Ֆրանսիան, Հունաստանը, Ավստրիան և Իսպանիան, գրավում են հայ զբոսաշրջիկներին: Ավելին, տրանսատլանտյան ուղղությունների մեծ մասը, հատկապես ԱՄՆ-ում, Կանադայում և Մեքսիկայում, հասանելի կլինեն կրթական, բժշկական կամ բիզնես նպատակների համար:

Երևանն այժմ միակ ուղղությունն է ամբողջ Կովկասի տարածաշրջանում, որտեղ Lufthansa խումբն առաջարկում է շաբաթական 16 չվերթ՝ չորս տարբեր ավիաընկերություններով.

• Ավստրիական ավիաուղիներ, որն ամենօրյա չվերթեր է իրականացնում դեպի Վիեննա դեռևս 2001 թվականից,
• Բրյուսելյան ավիաուղիները, որը դեպի եվրոպական մայրաքաղաք Բրյուսել չվերթեր է իրականացնում շաբաթական հինգ անգամ,
• Eurowings-ը (շաբաթական մեկ չվերթ հաճախականությամբ) և Lufthansa-ն (շաբաթական երեք չվերթ հաճախականությամբ), որոնք իրենց նոր երթուղիները բացեցին հենց այս օգոստոսին:

«Արմենիա» միջազգային օդանավակայաններ» ՓԲ ընկերության տնօրեն Մարսելո Վենդեն, շնորհավորելով ավիաընկերությանը, նշել է. «Այսօր աշխարհի ամենահեղինակավոր և վստահելի ավիաընկերություններից մեկը սկսեց թռչել Հայաստան: Վստահ եմ, որ բոլորը շատ ուրախ են նոր ավիաընկերության մուտքի և նոր ուղղությունների համար:

Lufthansa-ի ներկայությունը, անշուշտ, կխրախուսի նոր զբոսաշրջիկների՝ մեր երկիր այցելելուն, և Հայաստանի տնտեսությունը դրանից կշահի»: «Մենք շատ ոգևորված և հպարտ ենք, որ Lufthansa ավիաուղիներն այսօր բացում է իր նոր երթուղին Երևանից Ֆրանկֆուրտ»,- ժապավենի կտրման արարողությանը նշել է Lufthansa խմբի Արևելյան Եվրոպայի Վաճառքի գծով գլխավոր տնօրեն Պիտեր Փուլլեմը:

«Այս նոր ուղղությունը դեպի մեր ամենամեծ հանգույց հիանալի նորություն է ամբողջ աշխարհի հայության համար, քանի որ այն կարող է համախմբել ընտանիքներին, ընկերներին և հայ համայնքին: Ավելին, մենք հավատում ենք, որ այս հնագույն քաղաքն ապագայում ավելի շատ այցելուներ կունենա, քանի որ մենք գիտակցում ենք մեր կարևոր դերը տեղական զբոսաշրջության ոլորտի զարգացման գործում: Շաբաթական 16 թռիչք դեպի չորս տարբեր հանգույցներ. սա լիովին ճկուն և հարմարավետ ճանապարհորդական տարբերակ է»,- նշել է Պիտեր Փուլլեմը:

Lufthansa-ն իր ուղևորներին մատուցում է պրեմիում ծառայություն օդանավում և Ֆրանկֆուրտի իր հանգույցում: Այս նոր թռիչքը հասանելի է բիզնես և էկոնոմ դասերով:

Տարանցիկ տրանսատլանտյան թռիքչների դեպքում ուղևորները հնարավորություն ունեն լրացուցիչ տեղեր ամրագրել առաջին և պրեմիում էկոնոմ դասերում:

«Lufthansa Onboard Delights»-ը՝ սննդի բոլորովին նոր հայեցակարգը, էկոնոմ դասի ուղևորներին առաջարկում է սննդի և խմիչքների լայն և բարձրորակ տեսականի` գնման համար: Ուտեստների և խորտիկների գները կտատանվեն 2 եվրոյից մինչև մոտ 12 եվրո:

Անվճար կմատուցվի մեկ շիշ ջուր և փոքրիկ շոկոլադե անակնկալ: Ֆրանկֆուրտ երկկողմանի տոմսն արդեն հասանելի է՝ սկսած մոտ 400 ԱՄՆ դոլարից:

Տոմսերը կարելի է ամրագրել Հայաստանի տուրիստական ​​գործակալություններում, lufthansa.com կայքի միջոցով կամ Լվովում (Ուկրաինա) տեղակայված Lufthansa սպասարկման կենտրոն հեռախոսազանգի միջոցով, որտեղ ինֆորմացիոն աջակցությունն ու վաճառքը հասանելի են ինչպես անգլերեն, այնպես էլ ռուսերեն լեզուներով:

Հայաստանից մեկնողները պետք է ուսումնասիրեն ինչպես տարանցիկ երկրի, այնպես էլ վերջնակետ երկրի մուտքի սահմանափակումները և կանոնները: Ճանապարհորդության կանոնակարգերի ամենավերջին թարմացումները կարելի է գտնել ավիաընկերությունների lufthansa.com կայքում»,- ասված է հաղորդագրության մեջ: