«Էկոլոգիական անվտանգության ապահովման և ժողովրդավարության զարգացման» ՀԿ-ի նախագահ Ռաֆաել Ասրյանը նամակով դիմել է ՀՀ  վարչապետ  Տիգրան Սարգսյանին, պատճենն էլ ուղարկել է «Հայջրմուղկոյուղի» ՓԲԸ տնօրեն Պատրիկ Լորենին, «SAUR» խմբի գործադիր նախագահ Ջո Սեչին (Joel Seche).

«Հարգելի պարոն Սարգսյան,

Մեր ուշադրության կենտրոնում է Սյունիքի մարզի, մասնավորապես, Կապան քաղաքի    հիմնախնդիրները: 2012 թվականի մարտի 27-ից «Հայջրմուղկոյուղի» ՓԲԸ-ն ջրամատակարարման և ջրահեռացման նոր պայմանագրեր է առաջարկել կնքել Կապանի ազգաբնակչության հետ: Բայց երբ մեր կազմակերպության մասնագետներն ուսումնասիրեցին նոր պայմանագիրը, պարզվեց, որ նոր պայմանագիրը հնից տարբերվում է միայն մի բառով: Նոր պայմանագրերից հանված են «մաքրում» բառը, այսինքն`  «Հայջրմուղկոյուղի» ՓԲԸ-ն այդ նոր պայմանագրերով իր վրա պարտավորություն չի վերցնում կոյուղաջրերի մաքրման անհրաժեշտությունը: Կան բնակիչներ, ովքեր ստորագրել են այդ պայմանագրերի տակ առանց կարդալու, իսկ  բնակիչների մի մասը կարդացել, չեն ստորագրել և դիմել են մեզ, որպեսզի պարզաբանվի իրավիճակը: 

Պարզեցինք, որ «Հայջրմուղկոյուղի» ՓԲԸ-ն, արհամարհելով ՀՀ կառավարության 22 հունվարի 2004 թվականի N 130-Ն որոշման և ՀՀ ջրային օրենսդրությամ մի շարք կետեր, ինքնագլուխ, իր կողմից ստեղծած անօրինական պայմանագրով խախտում է ՀՀ կառավարության N 130-Ն որոշման 44 կետի ե ենթակետը, որտեղ ամրագրված է` ջրամատակարարը պարտավոր է կատարել բաժանորդի կեղտաջրերի հեռացումն ու մաքրումը` պայմանագրով նախատեսված քանակին ու որակին (բաղադրությանը) համապատասխան. և դա խախտելով` խախտվում են բաժանորդների և բնակչության իրավունքները:

Պարոն Սարգսյան, խնդրում ենք Ձեզ պարտավորեցնել «Հայջրմուղկոյուղի» ՓԲԸ հետ կանչել անօրինական պայմանագրերը, չխախտել և ուղղորդվել միայն  ՀՀ կառավարության որոշումներով ու ՀՀ ջրային օրենսդրությամբ:

Հետամուտ եղեք այդ խնդրին ի նպաստ ազգաբնակչությանը:

Կից նեկայացնում ենք հիմնավորող փաստաթղթերը`

1. «Հայջրմուղկոյուղի» ՓԲԸ կողմից ներկայացրած նոր պայմանագրի բնօրինակը չստորագրված բաժանորդի կողմից.

2. «Հայջրմուղկոյուղի» ՓԲԸ կողմից ներկայացրած նոր պայմանագրի պատճենը  ստորագրված բաժանորդի կողմից.

3.  «Հայջրմուղկոյուղիե ՓԲԸ և բաժանորդի հետ կնքված գործող պայմանագրի պատճենը.

4.  ՀՀ կառավարության 22 հունվարի 2004 թվականի N 130-Ն որոշումը.

5. ՀՀ կառավարության 22 հունվարի 2004 թվականի N 130-Ն որոշման հավելված N 2    հաստատված օրինակելի պայմանագրի ձևըե: